Taxistanan ta preocupa cu diferente desaroyo cu ta tumando luga pa loke ta mundo di taxi.
Por a tuma nota di cierto cosnan cu ta pasando cu entre otro autobusnan ta buscando cierto derecho y el a yega na oido tambe di e taxistanan.
Linda Orman, un di e voceronan di e taxistanan, a splica cu nan ta sinti cu na dado momento autobusnan no por soluciona nan problema, riba lomba di e taxistanan.
E ta conta cu nan a tuma nota cu den media a sali cu taxistanan a bay protesta y despues nan a bolbe sali den media cu nan ta buscando solucionnan.
Orman a comenta cu ta aplaudi cu a yega na cierto solucionnan riba baño, number di auto. Ta aplaudi cu nan perseverancia a logra esey. Pero ta pidi pa saca for di e ruta di San Nicolas, un grupo pa bin traha p’abao.
Tur hende sa cu taxinan a cuminsa riba e ruta di Palm Beach, for di tempo di e prome hotel. Djey a bin e autobusnan pa core e ruta ey pa e trahadonan yega hotel, mientras cu e area a sigui desaroya.
A bin mas facilidad pa e trahadonan di hotel pa nan por a yega nan trabao. Na October awo lo bay haci 40 aña cu Arubus tambe a join den e area ey. Awendia tin 450 taxinan, bo tin Autobus, bo tin Arubus, bo tin T y O, bo tin transporte ilegal, bo tin e kitrin-tour, bo tin e bicicletanan, bo tin e segwaynan. E area eynan ta satura segun Orman.
Si kier bisa cu kier saca un grupo for di e 68 autobusnan pa bin p’abao, y ta wardando un TNO rapport pa tuma un decision, no mester ningun rapport pa wak esey.
Tur hende ta wak cu e area ey ta satura. Na e momento cu e minister anterior a kibra e moratorio cu nan consentimento a manda mas vergunning di autobus, e momento ey mester a reacciona, bisa cu no por.
Ta dimas caba, segun Orman. A permiti pa saca mas vergunning, sabiendo cu e lo perhudica tambe den e entrada.
Tin ora hopi hende ta tuma un decision, of djis pa complace gobernante, lubidando cu esey ta perhudica. Awor aki tin perhudicacion. Ta bisa cu Arubus mester bay haci miho pa e elimina pirateria di Westpunt pa Playa. Pero kico autobusnan ta haci pa soluciona esey tambe.
Pasobra ta nan ruta tambe. Kico lo bay haci pa soluciona esey. Den e ruta ey, dominante ta Autobus y Arubus. Ta culpa Arubus, pero no ta mira kico ta e fout den e rutanana ki.
E ora ey e taxistanan den Palm Beach ta completamente yen. No por permiti pa mas yega den e area ey. Por permiti si pa bin control. DTP mester cuminsa eherce control. Polis tin cu controla e A-nummernan tambe, e transporte ilegal. Kier pa e wordo haci, segun Orman. Pero pa yena e area ey mas, no por.
Poder
Poder nunca e taxistanan tin. Ora cu un gobernante dicidi riba algo, hopi biaha esun cu ta envolvi, no tin mucho di bisa. Por protesta, pero despues ta wordo mal mira pasobra a protesta. E problema riba tur e islanan aki, en particular Aruba, cu ora campaña yega, presion ta hopi halto cerca e gobernantenan, pa complace cierto deseonan.
Den e deseonan ey, e ta wordo cumpli, sin tene na cuenta cu esnan cu ta eherciendo nan trabao den e sector ey. Esey mester cuminsa bira mas conciente di dje. Mester cuminsa bira mas conciente ora di bay vota, unda cu tin cu pensa pa bo pais. Si bo pais progresa nos tur ta progresa, segun Orman.
Tur biaha cu tin cualkier color politico den gobierno, ta keda hopi biaha na merced di e decisionnan cu nan tuma. Taxistanan mester cuminsa wak nan propio color. E señal letter preto y borchi geel. For di awo p’adilanti ta esey tin cu traha p’e, pa por sigura nan status, sigura nan futuro y sabiendo cu tin control den e vergunningnan, pa nan eherce nan trabao como debe ser.
Mas autobus kier core Palm Beach
E autobusnan no a expresa explicitamente. Pero taxistanan ta bisa si, cu e ruta ey ta out of the question. E ruta ey ta yen caba. Tin varios competencia caba eyden, cu en realidad e ruta ey, ta taxi so tabata riba e ruta ey for di comienso di e prome hotel. Desaroyo ta tuma luga, mas cos ta bin acerca, modernisacion. E taxistanan a perde hopi di e ruta ey.
Dependiente
Por bisa cu e taxistanan ta 98% turismo. Nan ta haya hende local, pero no cu ta nan mercado cu nan ta biba di dje. Al contrario, esnan cu ta subi taxi, nan ta crea un amistad cu e chauffeur, nan ta haya transporte. E chauffeur ta duna nan excepcion riba prijs, etc. E no ta un mercado cu nan ta biba di dje tur dia. Segun Orman, e taxista ta biba di e turista, esta aeropuerto, hotel y turismo crucero. Si drenta den e mercado aki, ta stroba tur esnan cu ta riba e ruta aki caba. Si subi 50 taxi mas, tambe ta bay stroba. Manda bus of taxi, tur dos grupo ta wordo perhudica. Esunnan cu ta coriendo e ruta ey caba, ta bay sinti’e. Esey no ta e solucion.
