Recientemente altocomisario di polis, drs. Ramon Arnhem a ricibi un auto nobo pa e por eherce su funcion. No ta cuestion cu e no tabatin un auto prome. Ta apenas un aña pasa cu el a ricibi un auto nobo nobo marca Hyundai modelo Tucson. Pero, segun regla, e altocomisario di turno ta ricibi mesun tipo di auto cu e patruyanan di polis.
Den e destaho di e autonan di polis, Arnhem tambe a yega na turno pa ricibi un auto, marca Ford modelo Everest, t’e mesun tiponan cu e patruyanan. E auto ta ekipa completo cu zwaailicht y sirena. Pa Arnhem, e ta sinti cu e auto ta uno grandi y personalmente, e no ta un hende cu ta preocupa pa cosnan material.
Pero debi na e destaho y regla, automaticamente e hefe di polis ta ricibi un auto. Esaki no ta un situacion nobo, tur altocomisario di turno tabatin un auto igual cu e patruyanan. Contrario na esunnan prome, Arnhem a dicidi cu lo pone sticker riba e auto. Anteriormente no a mira tipo di actitud asina, mas bien a uza e auto 24/7 pa hasta cosnan personal.
Arnhem a dicidi cu lo pega sticker p’asina polis ta mas visibel riba caya. “Ami mes, no ta haya e ta necesario”, asina e altocomisario di e cuerpo arma a termina bisando durante un entrevista cu 24ora.com na Centro di Husticia na Macuarima.
