Diadomingo mainta, den careda di 10’or, a sosode un accidente basta fuerte riba LG Smith Boulevard, net dilanti di Bestuurskantoor. Un chauffeur cu un Hyundai Getz color berde, number di auto no paga y sin seguro, bayendo ariba cu velocidad hopi halto, a dal un peaton turista, cu a crusa caminda e momento ey.
El a pasa riba e brug y dal e turista, bayendo ariba. E impacto tabata fuerte. A mira cu e persona a dal su cabes, kibra e windshield y tur su cabeynan, etc. a keda pega riba e windshield kibra.
Mesora a bati alarma. Na momento cu polis di trafico, polis di visibility team y tambe ambulance, como tambe Rapid Responder di Imsan, a yega na e sitio, nan a cuminsa atende cu e victima.
E persona tabata na tino. E tabata sinta riba acera canto di caminda. El a bay cumpra algun comestibles, etc. y net ora el a crusa caminda, auto a dal’e. Nan a atende cun’e y despues por a mira cu e tabata tin basta rasca na su curpa, na man, cu dolor di cabes. Despues e mes a lanta drenta ambulance, unda cu nan a transporte pa hospital.
Su mama a wordo yama for di hotel, y a core yega pa wak su yiu, cu tabata herida. Polis a atende cu e chauffeur. El a splica cu ta un auto nobo e tin. Esey ta e auto cu e ta usa pa bay trabao. Net el a haci e cambionan riba e auto aki y ora cu a pone supla, el a supla 0. E no tabata bao di influencia di alcohol.
Polis a mustr’e si riba su responsabilidad di ta core auto duro riba un ruta yena di hende, sperando Sinterklaas.
E ta hopi iresponsabel, nan a splik’e. A bise tambe cu e no por core auto riba caya si e no tin seguro, etc. Cu su cosnan no ta na ordo.
A splica nan cu el a traha y placa no ta yega. E placa ta net pa come y ta net diabierna el a cobra y tabata pendiente pa dialuna bay paga seguro di e auto.
