Dialuna mainta Minister di Turismo y Salud Publico, Dangui Oduber a ricibi director di Organo Ehecutivo (OE) di AZV, ir. Edwin Jacobs, pa haci entrega di e relato y cuenta anual di e fondo di AZV di aña 2022. Minister Oduber ta satisfecho cu AZV ta na tempo cu su cuenta anual, cu ta importante pa e sector di cuido.
Ta resalta for di e relato anual e impacto di e crecemento di turismo riba entrada di e fondo di AZV ta positivo. Esaki tabata di tal forma cu hunto cu accionnan pa mitiga e costonan e meta di minimalisa e contribucion di gobierno na e fondo a keda realisa.
AZV a cuminsa aña 2022 proyectando entradanan di prima y BAZV na 460,2 miyon florin, mientras a calcula cu e accion pa baha costo di cuido, cu e gasto total di e fondo lo alcansa 462,9 miyon florin. Esaki ta inclui recorte den cuadro di e di 5 “wave” di COVID19. Esaki lo a nifica cu pais lo mester a contribui cu 2,9 miyon florin.
E crecemento impresionante di turismo na 2022 a resulta cu na final e entradanan di e fondo tabata 26,7 miyon florin mas cu e proyeccion. Mientras e gasto pa cuido a resulta 16,5 miyon florin mas cu proyecta. Esaki debi na, entre otro, cu no tabata oportuno pa implementa tur recorte y accion di mitigacion di costo di cuido manera plania.
Durante cu e aña tabata avansa, a premira un crecemento grandi di entrada di e fondo y esaki den combinacion cu e contribucion di sector cuido y di aseguradonan, a logra crea un espacio pa inversion.
AZV den deliberacion cu Ministerio di Salud Publico a destina un poco mas cu 9 miyon florin na inversion den cuido di nos pais, manera den entre otro:
- compra di ambulance;
- contribucion na ImSan pa atende cu lista di espera den retinologia y ampliacion di cuido di wowo;
- contribucion na hospital pa atende lista di espera den radiologia, urologia y gastroscopia;
- compra di 14 stul nobo di dialyse;
- contribucion na un software pa conecta dunadonan di cuido, laboratorionan y AZV;
- contribucion na atende lista di espera pa cu salud mental;
- contribucion na prevencion.
Na final di aña, BAZV a conoce un crecemento adicional cu no a proyecta. Esaki tabatin como consecuencia cu e fondo di AZV a conoce un resultado positivo chikito di 1,5%. A destina esaki den inversion atrobe den e fortificacion y transformacion necesario di nos sector di cuido, preparando esaki pa e retonan di futuro.
Final di aña pasa, Gobierno di Aruba a encarga AZV pa desaroya e instrumento di cuadro financiero di mas aña. Esaki como meta pa reemplasa e recorte di 60 miyon florin. Edwin Jacobs a informa cu AZV hunto cu expertonan local y den consulta cu ministerio, sector di cuido di salud y experto di Hulanda ta trahando pa presenta e proyecto aki proximamente.
Na final, Edwin Jacobs a indica cu mirando cu economia a alcansa bek su nivel di 2019, e tema di migracion ta bira actual atrobe y esey ta presenta su retonan pa e sector di cuido y e fondo di AZV. A palabra cu AZV lo presenta na gobierno su preocupacion riba e asunto aki.
Minister Oduber a gradici AZV, su personal y tur e dunadonan di cuido pa nan contribucion durante 2022 den realisacion di e maneho di Ministerio di Salud Publico y ta mira cu positivismo e desaroyonan den e prome kwartaal di 2023. Hunto lo sigui traha pa pone un fundeshi solido pa Aruba por enfrenta su retonan den salud e proximo añanan.