E sospechoso di a comete atraco hunto cu dos otro persona y cu a detene e mesun anochi den area di Noord, ta resulta di ta permaneciendo ilegal na Aruba y cu a yega cu boto clandestinamente for di Venezuela. E material haya riba dje ta confirma cu ta procedente di e Atraco cometi mas trempan.
Notabel ta cu Minister di Husticia, mr. Andin Bikker a mantene e custumber y forma di traha di e Minister saliente. E mesun anochi di detencion el a bay Warda di Polis pa papia cu e recherchenan, algo cu ex Minister Dowers a cuminsa cune y mantene te dia cu el a baha como mandatario. Tempo di Minister di Husticia di MEP esaki no tabata e caso.
Un sosten y oido di e mandatario di Husticia ta masha importante. E contacto directo di un mandatario responsabel ta bon pa asina nan mes mira e necesidad di e cuerpo. Ta spera cu e presencia di Minister di Husticia Andin Bikker keda tambe ora cu tin casonan serio sosode.
Ainda e otro atracadornan ta canando liber pero por detenenan na cualkier momento. Ta cuestion di interoga y asina saca afo precisamente kende e otronan ta. Además mester saca afo di kende e auto ta cu nan tabata core aden. Ken ta facilita e grupo di delincuentenan aki auto pa nan por move di un luga pa otro.
