Tabata pa mas of menos 11:35 pm cu bisiñanan den Pagaistraat a bati alarma pa un caso di atraco arma. Polis a yega mesora na e sitio y a bin haya un mama y su yiu muhe mara den cas, na Pagaistraat # 15.
Di acuerdo cu informacion oficial di polis, basa riba declaracion di e victimanan, cu 3 hende homber papiando Spaño a drenta nan cas, cu arma di candela den man, a mara nan y atraca e habitantenan den e cas. A horta un suma di placa bay cu ne, pero e cantidad no ta conoci ainda.
Bisiñanan a conta 24ora.com, den forma exclusivo, cu nan a mira un auto blanco bandona e caya cu velocidad halto, indicando cu nan sospecho ta riba nan. E victimanan mes ta nobo den e bario, pues bisiñanan no conoce nan bon pa sa kende nan ta y kico nan ta haci cu lo a atrae atracadonan cerca nan.
Ta trata aki di un compleho di varios apartament, di cual e habitantenan aki, di nacionalidad Peruano pero biba na Venezuela, tabata cla pa biaha diadomingo awo. Nan tabatin nan cen warda pa biaha cu ne. E mama tabata na telefon cu un hende ora cu e atracadonan a drenta e apartament pa horta nan pertenencianan y nan placa. E gritonan di auxilio a activa esun cu e tabata papiando cu ne na telefon y e bisiñanan. A yama polis pa nan pa avisa cu tin un ataco tumando luga na e momento ey den e apartament.
Di acuerdo cu standardnan normal, e ekipo di recherchenan di Atraco Team a presenta pa tuma e investigacion over mientras cu a pidi e ekipo di sosten na victimanan pa brinda ayudo na e mama y e yiu cu a keda masha spanta pa e susto indesea cu nan a pasa aden awe nochi.
Pa Cuerpo Policial por resolve mas caso, cooperacion y informacion di pueblo di Aruba ta hopi importante. Pesey si bo tin cualkier informacion, yama e tiplijn: 11141. Ta garantisa bo anonimidad.
