E sospechoso principal di e atraco arma riba e joyeria “Jewels in Paradise” situa den The Ritz-Carlton Resort & Casino, ta haciendo uzo di su derecho di keda keto. E homber di nacionalidad Venezolano no ta papia ningun palabra cu e ekipo di recherchenan investigando e atraco. Consecuentemente, e no ta yudando tampoco pa Polis por yega na e di dos sospechoso cu keto bay ta den libertad.
Ministerio Publico a confirma cu e sospechoso en cuestion ta sigui deteni y cu Fiscal a prolonga su detencion. Tin suficiente prueba, manera imagen di camaranan, fingerprints y otro detayenan forensico cu por wanta e sospechoso aki encarcela pendiente e caso penal andando. Dor di keda keto e ta haci e trabou di Polisnan mas pisa, pero no imposibel.
Si den comunidad tin mas informacion di e otro sosospechoso envolvi, no bacila den informa Polis pa yuda soluciona e caso aki. Ta cu sosten di comunidad mes Polis por purba garantisa mas siguridad den pueblo.
Fiscal a opta pa no bay den detaye y como tal no kier a contesta e pregunta si a recupera gran parti di e botin, cu a horta durante e atraco arma den e hotel mas luhoso di nos pais.
