Diasabra anochi pa mas o menos 9:50pm, dos atracado, un bisti na Santa Claus y otro completamente na preto, a yega The Ritz-Carlton Aruba cu arma di candela den man pa atraca e joyeria. For di pafo nan lo a los tiro rib e miembronan di siguridad, pero danki Dios no a herida ningun. Paden a bay cu un botin grandi di joyas y prenda di hopi balor. Polis ta investigando.
Mesora despues di e atraco, a mobilisa Polisnan di tur banda pa e area di Bakval, Saliña y Noord. Ey a haya parti di e joyasnan cu a cay den mondi, a haña e barba falso di Santa Claus y a haña paña cu a uza pa e atraco. Polis a interoga e trahadonan di e joyeria y di e hotel, cu a pasa den un susto hamas bisto.
Polis lo tin un of mas persona di interes deteni, aunke no ta conoci ainda si ta e sospechosonan envolvi a logra haña caba. Ta buscando e armanan di candela uza den e atraco grandi aki, den cual a uza arma di candela y a horta un suma grandi na joyas y prenda for di e hotel mas luhoso di nos isla.
Ya caba a haña hopi joyas riba e ruta pa e atracadonan scapa, a haña handschoen cu a uza y mas. Pues ta riba un “bon pista”.
Tur esaki mientras Polisnan ta concentrando riba miles di hende gozando den Fakkeloptocht, tanto den parada como tambe na banda di caminda. E ladronnan a pensa cu esey ta un bon chens pa logra nan meta di aplica economia “facil” esta pa horta y yega na bienes. Ta parce cu Polis a activa suficiente lihe y eficiente cu nan ta hopi cerca di e sospechosonan.
Si abo sa mas of a mira algo of ta na altura di mas informacion, yama Polis na 11141 y laga bo tip den forma anonimo. Asina ABO TAMBE por aporta na garantisa mas siguridad y trankilidad riba nos isla.
