Ateliers ’89 Punto Di Beyas Arte Aruba tin e gran placer y honor di anuncia gran apertura di su exposicionnan nobo.
Diahuebs 19 di mei 2022 pa 8:00 pm. Unda lo presenta cuater diferente exposicion nobo di su programanan andando, manera Arte Den Bario y workshop nan di 3D, fotografia y film.
Arte Den Bario ta un programa di traimerdia cu Ateliers ’89 ta bin ta ehecutando ya pa mas di 10 aña caba. Esaki como su proyecto especial p’e muchanan di menos recurso den diferente bario local. Aña pasa y aña aki a duna diferente di e workshopnan aki completamente gratis na participante nan di, Fundacion Centro Familiar Sabana Basora cu colaboracion di Josefina Gross y e proyecto Gen297 di ATHA bou guia di Franchesca Heinze na Centro di Bario Brazil. Awor a haya e oportunidad unico pa mustra un muestra rasonabel di e obranan traha cu colaboracion di Fundacioin Eterno bou guia di Osaira Muyale.
Cu pintura, dibujo y 3D. Musica y Film bou guia di Adriano Nanof di Fundacion Cine Aruba. Durante e workshopnan aki a traha cu e muchanan di edad rond di 8 pa 16 aña. E no solamente tabata pa trece e hobennan aki den contacto cu arte si no tambe pa siña nan expresa nan mes den tur otro forma y diciplina. Esaki ta haci e exhibicion aki den nos White Box, uno hopi interesante mes. Na unda por observa y purba na compronde cada obra y personahe cu ta papia pa su mes. Den e salanan mayor nos ta mustra e resultado di fotografia y 3D cu plastic recicla. Den e tempo corto di un luna e participantenan a traha duro pa realisa y logra mustra nan trabou nan nobo den ambos diciplina. Unda e parti di e exposicion di fotografia “reparing memories”, ta resalta cu su potretnan precioso. Tambe e instalacionnan cu plastic “tracing steps”no lo ta menos interesante cu instalacion imprecionante. Na final di e exposicion den e sala chikito lo presenta e obranan di nos workshop pasa di film titula Equivocal. Aki bo tin di warda bo mira e obra cu e streyanan mas grandi di e anochi, e cachonan estelar Mexicano na Aruba. Un anochi cu ta promete di bira sin igual y cu hopi mes pa mira y experencia y tur esaki cu entrada gratis.
Mira aki e invitacion personal oficial y flyers nan special traha pa nos presentacion di e obranan traha durante e ultimo luna nan di nos proyecto stima ARTE DEN BARIO unda tambe Punto Di Beyas Arte Aruba ta presenta su exposicionnan nobo di su workshopnan di 3D y FOTOGRAFIA y Film. No perde e oportunidad unico aki, apoya y siña balora e exprecionan aki contemporaneo di nos artista y nan ARTE!
