Atardi, the life of Curacao’s musical genius Rudy Plaate a estrena dia 9 di juli ultimo na Korsou i dia 10 di juli na Aruba. Un publiko varia a disfruta hinter fin di siman di e documental aki den salanan di sine di The Movies na Kòrsou i Aruba. Den diferente sala sold out e publiko por a eksperensha kon siniasta Selwyn de Wind ta pone lus riba e estilo i herensia di e evolushon di Korsou su musika, mirá via di historia di Señor Rudy Plaate.
Señor Plaate mes tambe tabata presente durante di e anochi di estreno na Kòrsou pa disfrutá di e dokumental aki. Kreá durante di un periodo di 5 aña, e dokumental ta pasa riba e momentunan bon i difisil di e bida i trabou di e legendario musiko i kompositor Rudy Plaate.
Un kantidat ekstenso di imagennan di antes ta keda kombiná ku entrevistanan di famianan, amigunan, otro artistanan i konosedónan di historia. E briante kanta-outor i musiko Rudy Plaate a skibi i publika mas di 400 kantika durante un karera ku a dura mas ku kuater dekada. De Wind a haña akseso total na Rudy Plaate pa krea un potrèt intimo di e bida di Rudy, awor ku e ta konfrontá e desafio nan di behes.
Atardi ta un ko produkshon entre Pantalla Chica Productions i De Wind Imanging kabesa pa siniasta i fotografo Selwyn de Wind. E tim di Atardi ta sumamente gradisi na tur e bon reakshon nan risibi awor ku e dokumental ta pasando. Tambe nan ta gradisi e apoyo ku nan a risibi durante di kreashon di e pelikula aki. Un danki speshal ta bai na tur esnan ku a duna un aporte finansiero, esta: Prins Bernhard Cultuurfonds Caribisch Gebied, MCB, Coca Cola, Michael & Vani Elias – De Haseth, Korpodeko, WE Group, The Curacao Financial Group, Curinde, Curacao Tourist Board, Central Bank of Curacao, Tui Curacao, Ibis Management, Curacao Airport Partners, Banco di Caribe & Distribier. Atardi lo keda pasa durante di e simannan benidero na The Movies Punda, The Movies Otrobanda The Movies Principal i The Movies Renaissance. Karchi ta optenimbel via di websitenan di The Movies i na loket di e respektivo teaternan. Pa sigi tur desaroyo rondo di e pelikula aki por sigi rednan social ku e nòmber @Atardithefilm.
