Un susto grandi cu un grupo di Arubiano a pasa aden den e Food Court di Florida Mall na Orlando, ora cu a bin un problema. Un miembro di e grupo, undama Arubiano, a keda herida cu fractura na brasa.
Na prome instante a papia di tiramento den e mall, pero despues a bin resulta cu no ta asina. Mirando e caos cu tabata tin na e momento ey, tur hende a cuminsa core, unda cu dado momento durante e conmocion, e dama a cay y nan a trapa riba dje, fracturando su brasa.
Pelea
Pa loke ta e problema mes, tabata un pelea entre un hende homber y un hende muhe, unda cu un di nan supuestamente tabata tin un arma di candela y cu a los tiro, pero despues a bin resulta di ta stoelnan cu a cay, cual e publico a kere cu tabata tiro, segun polis.
Esaki sigur a causa panico den food court cu a causa cu hende a cuminsa core y busca refugio durante e panico.
Durante e caos, dos persona a keda herida y un di nan a haya un atake di curason, polis a sigui bisa.
Tabata tin presencia masivo di polis y tambe brandweer a despacha cinco ambulance pa e mall.
A evalua cu lo tabata tin 18 persona cu heridanan leve, hibando ocho di nan pa hospitalnan den e area.
Despues na final di dia, oficialnan na mando a bisa cu ya polis a detene e dos individuonan cu a bringa cu otro den e food court.
