Awe diaranzon 14 di maart personal di Arubahuis y ATA Europa a cera conoci cu e Representante di Aruba na Union Europeo y Minister Plenipotenciario Suplente Eddy Paris.
Minister Plenipotenciario Guillfred Besaril a yama sr. Paris bon bini na e team di Cas di Aruba. E mandatario a bisa cu despues cu director a.i. Glenn Ling a cuminsa cu su trabao na Cas di Aruba, awor cu binimento di sr. Paris e management team di Cas di Aruba ta completo y por completa e proceso di formacion di Cas di Aruba.
Minister Besaril a bisa cu tin hopi reto y pesey e ta contento cu e aporte di Eddy Paris den esaki.
Sr. Paris a gradici Minister Besaril pa e caluroso recepcion. Ela bisa cu elo enfoca como representante di Aruba na Union Europeo riba por ehempel e posibilidad cu Union Europeo ta brinda riba e tereno di enseñansa. Tambe ela bisa di ta sigur cu e por conta riba e expertisio cu tin na Cas di Aruba pa desplega su trabao na bienestar di Aruba na Hulanda y Europa.
