Den e ultimo dianan aki tin hopi polemica riba e celebracion di Arubadag na Hulanda. Despues di un fin di siman di celebracion engrande na Aruba di nos Himno y Bandera, e fin di siman aki ta toca e turno na nos Arubanonan residencia na Hulanda pa haya un poco di e sabor di e celebracion di Dia di Himno y Bandera na Hulanda mes.
Esaki ta un tradicion di hopi tempo caba pa brinda Arubanonan cu ta biba n’e tera friew pa hopi tempo of pa e studiantenan e oportunidad pa uni y sinti e toke di e celebracion aki.
Durante e dia aki, Arubanonan ta topa otro pa saluda y intercambia di idea. Pa Gobierno tambe, e dia aki ta importante pasobra aki Gobierno por presenta su vision na Arubanonan residencia na Hulanda tambe.
Prome Minister ta bisa cu e enfoke di Gobierno e aña aki ta pa convence e Arubanonan residencia na Hulanda pa bin bek Aruba pa yuda drecha e economia di nos pais. Gobierno ta prefera pa nos hendenan bin bek prome cu bay na pidi otro personanan di otro pais bin yuda desaroya nos economia. Na Aruba tin hopi potencial y oportunidad y ta importante pa nos hendenan bin bek.
GASTONAN DI ARUBADAG:
Contrario na añanan anterior na unda AVP a organisa Arubadag, e Gobierno di Gabinete Wever-Croes a instrui Arubahuis pa reduci e gastonan di celebracion considerablemente mientras ta percura pa tin un celebracion agradabel pa nos hendenan. Brinda nos hendenan un ambiente Arubano cu un presupuesto hopi mas abou.
Pa cua motibo, Prome Minister ta enfatisa cu e aña aki ta dos banda so a bay compara cu 8 banda cu AVP a hiba na 2017 cu a costa hopi mas cu e aña aki.
Cu esaki Gobierno di Aruba ta mustra cu hopi menos gasto toch ta prepara un celebracion grandi pa tur Arubanonan gosa y ohala por cuminsa haya e sentimento pa bolbe pronto Aruba caminda cu Gobierno ta preparando oportunidadnan di trabou y di negoshi pa nan.
