Despues di ausencia di cuater (4) aña e celebracion di Arubadag ta bek. Y na e luga di custumber: De Broodfabriek, na Rijswijk. Rubianonan por cuminsa na reserva e fecha di 21 di april, ya cu esaki lo bira un berdadero Dia di Famia, pasobra e lo bay ta un evento pa grandi y chikito.
Marko Espinoza di Headlines Group ta actualmente na Hulanda y a combersa cu Anthony Arends (Deal Entertainment), motor tras di e evento aki, cu e apoyo di Arubahuis.
E ultimo evento di Arubadag a tuma luga na aña 2019, den Ahoy na Rotterdam.
“E lo ta un celebracion grandi manera tabata custumbra cu ne den pasado,” Arends a sigura. Lo bay tin cumindanan dushi di Aruba, skina pa e muchanan hunga, y pa pone e cherrie riba e bolo di e celebracion ta bay tin un competencia di domino, cu lo sosode entre 12:00 y 2:00 PM. Pues net prome cu e parti di musica cuminsa.
E programa ta uno amplio, cuminsando pa 12:00 PM cu e parti cultural, cu e weganan di domino den skina. Den e parti aki tin presentacion di Jonathan Croes cu su All Star Band, presentando cancionnan di Aruba. Durante e parti aki tambe lo tin baile di cinta.
E organisado ta den combersacion cu un artista grandi duna un presentacion riba e fecha aki. Nan ta spera di por finalisa e negociacion e fin di siman aki pa por haci e anuncio oficial. E banda principal den e celebracion aki ta Tsunami cu lo presenta dos set. E prome lo ta un combinacion di musica bailabel y den e di dos set lo presenta La Hora Loca, unda cu tin musica di carnaval.
Y despues di hopi tempo e Rubianonan lo por bay disfruta di e musica di Honey Pot cu tambe lo duna un presentacion.
Tin diferente otro artista individual manera Rocco.
E venue aki ta situa na Rijswijk, cu ta keda entre Delft, Den Haag y Rotterdam. Pues unda tin poblacion grandi di Rubiano. A yega di celebra Arubadag eyden pa hopi aña.
