Diamars un avion di Delta Airlines a hay’e ta regresa di emergencia Aruba, despues di a lanta vuelo pa Atlanta, debi cu un motor a pega na candela. Piloto di e Boeing 737900 a draai rond di e isla cuater biaha prome cu e por a baha debi na ‘problema mecanico.’
Un vocero di e aerolinea a informa DialyMail.com cu abordo tabatin 168 pasahero adicional di e cuater stewardnan y dos piloto. E pasaheronan a haya nan ta keda un anochi mas na Aruba, unda cu diaranson nan por a biaha. E vocero a bisa: “Vuelo di Delta DL581 di Aruba pa Atlanta a experencia problema mecanico despues di a lanta. El a baha safe y a regresa gate sin problema.” Incluso el a sigura cu e team di Delta tabata traha pa asina e clientenan por a yega nan destinacion final mas lihe y safe posibel.
Un pasahero a describi e situacion riba Reddit. Aki el a bisa cu “un di e motornan a rementa durante lantamento di avion, nos a draai rond Aruba cuater biaha y a baha di emergencia.”
Otro pasahero a bisa cu Delta a paga hotel y cuminda p’e pasaheronan. Un otro pasahero a bisa cu nan a scucha un “zonido fuerte” durante e vuelo. “El a zona manera el a pasa despues cu e landing gear a hisa. Mi a pensa prome cu un banda di e gear a pega y a lanta laat.” E pasahero a sigui conta cu e capitan a anuncia cu e motor robes tabata na candela, pero tabata bou control. Despues di a haci chekeo necesario, e piloto a dicidi di bay bek Aruba.
“E pasaheronan tabata basta calma. Nos a baha e avion y a bisa nos cu un parha grandi a bula den e motor.” E pasahero a bisa cu voucher di cuminda ricibi di Delta tabata mas o menos di diescinco dollar pa persona.
Esaki ta e reciente mal noticia pa Boeing cu desde comienso di aña ta enfrenta problema. Diamars, e cabes di U.S. Federal Aviation Administration, a bisa cu Boeing mester mehora su cultura di siguridad y adresa e calidad di problema prome cu e agencia permiti e fabricante di avion aumenta e produccion di 737 MAX.
