Dr. Choudhry ta dokter di riñon y durante entrevista a splica riba e parti di transplante di riñon. E mes ta un transplantatie nefroloog y desde 2003/2004, Aruba ta den un programa di transplante. Na Amsterdam ta haci transplante pa Aruba, Boneiro y Corsou y recientemente pa St. Maarten. Si ta dialysa, dependiendo di e bloedgroep, bo ta bin riba un lista, e ora bo por haya un riñon for di un persona cu a fayece, of bo por haya un riñon for di un persona viviente, pero e mester ta un donor. E no mester ta un famia, sino tambe un otro persona, kende kier ta donante na bo causa.
Dr. Choudhry ta orguyoso di e cultura Arubiano, pasobra via e Living Transplant Program a expande akinan y por mira hendenan hoben, 30 aña bieu cu ta dialysa, ta haya riñon di hendenan balente cu kier duna nan riñon. Esey ta un ehempel di un persona cu no ta un famia, pero ta haya riñon di e persona y por haci esaki na Amsterdam. Nan ta wordo planea pa un transplante. Bo por biba cu un riñon y bo por bira bieu sin problema. Si bo ta saludabel y bo no tin problema di salud, sea presion, sucu of otro, bo por bira bieu cun’e. Ta duna semper cu ta interesa, por tuma contacto cu e clinica di nefrologo y haya sa mas con bo por bira un donante di un riñon. Tin hopi hende hoben cu ta dialysa y cu tin famia y tres biaha pa siman nan tin cu bay hospital y no tin donante. E dokter ta spera cu tin hende den e populacion na Aruba, cu toch kier ofrece un riñon.
