E stock di testnan di Covid-19 a baha pero esaki no ta nifica cu Aruba ta bay keda sin test. Esaki Minister di Salubridad Publico Dangui Oduber a bisa den un declaracion.
Testnan no ta cabando, e mandatario a bisa cu enfasis. Mester tene cuenta cu Aruba ta un di e paisnan na mundo unda mas test ta haci, per capita, yegando 30 mil test haci. Ta test tur hende cu ta yega Aruba pa protege tur esnan cu ta traha den e sector, y isola e positivonan. Pero tambe ta test localmente den un forma agresivo. Di e forma aki ta detecta e casonan positivo mas lihe. E testnan lo no caba y ta normal tambe cu ora ta test den forma agresivo, e ta pone presion riba e stock. A haci un ordo recientemente y tur stock nobo normalmente ta pa un periodo di dos luna. Ta normal cu lo mester hacie ordo aki den forma regular pasobra Covid-19 no ta bay disparce pa awo. “No mester tin miedo cu no por sigui haci test na Aruba. Nos tin suficiente capacidad pa sigui test riba e mesun ritmo,” Oduber a bisa.
Loke si e ta contento pa bisa ta cu e ultimo siman a mira un reduccion di casonan positivo, despues di a registra un dia record cu mas di 170 positivo. Despues el a bin ta bahando y e “positivity rate” tambe ta bahando, pa cual nan ta “cautelosamente positivo” ya cu e ta nifica cu ta contagiando menos persona. “esaki ta e strategia cu nos ta hibando pa baha e casonan positivo te na un cantidad di 30 caso positivo pa dia, nos ta sinti cu nos tin e situacion bou control y lo no tin presion riba e seccion di Covid-19 y ICU na hospital. E cantidad aki DVG por haci su debido controlnan riba e fuente di contacto, tambe riba isolacion y cuarentena.”
Bayendo bek riba e stock di testnan, el a bisa cu regularmente ta controla esakinan.
