Sindicato SIMAR hunto cu mayor- y maestronan di Scol Paso Pa Futuro a presenta na Parlamento pa entrega dos carta di manifiesto na Presidente di Parlamento. Den e cartanan aki a trece dilanti nan punto y kico tur a papia cu Minister di Enseñansa, dr. Rudy Lampe. Parlamentario di RED, Ricardo Croes, a reacciona riba e manifiesto y esaki no a cay den bon tera cerca e maestronan ni sindicato. Palabranan a bay y bin di ambos banda.
Josephine Albertus, presidente di SIMAR, a splica presidente di Parlamento cu e maestro y mayornan no tin confiansa den e mandatario pasobra e no ta mantene na palabracionnan. Diaranson ultimo a reuni cu e mandatario na John F. Kennedy y a yega na un acuerdo cu no lo muda e scol, pero nan kier e siguransa cu e mandatario no ta cambia e palabracion.
A reuni cu e mandatario y yega na un acuerdo, pero despues a haya un carta dia 24 cu ta bisa e plannan ta sigui. SIMAR hunto cu e docentenan di Scol Paso Pa Futuro kier pa Parlamento scucha nan riba e asunto aki. Situacion aki ta algo inecesario, pasobra ya caba e docentenan tin hopi stress cu e situacion di financia, COVID-19 y awo esaki.
A reuni cu Minister Presidente y a splica di tur cos, pero esaki ta extra peso pa e mandatario, segun Albertus. A entrega dos carta, uno di mayor y uno di maestro, na Parlamento. Ta pidi pa un reunion mas pronto cu por, pasobra nan kier mira trankilidad pa docente- y mayornan. Juan Thijsen, Presidente di Parlamento, a bisa di ta compronde e preocupacion y puntonan ta valido. Ta responsabilidad di Minister di Enseñansa, pero Parlamento lo atende cu minister riba e problema aki.
