Despues cu e rumornan tabata bayendo rond di un gran concierto, Elite Empire y Elite Productions hunto cu tur partner a confirma cu dia 9 di december e cantante Romeo Santos lo tene su concierto aki na Aruba.
Mark-Benson Denz, representante di Elite Productions, a indica durante e conferencia di prensa cu hopi hende tabata spera e anuncio importante aki. No solamente hende di Aruba, pero di exterior tambe, tabata yama y manda mensahe pa haya tur informacion di e rumor cu tabata bay rond di un gran concierto.
Larissa Bermudez, mercadeo di evento, a expresa despues di cuater aña sin concierto of festival di un magnitud grandi di publico, Elite Empire y Elite Productions hunto cu nan partnernan strategico a confirma cu Aruba oficialmente ta un di e stopnan di La Gira Tour di Romeo Santos. Romeo Santos lo t’ey na Aruba diasabra, 9 di december. E concierto ta tuma luga den Aruba Harbour Arena. Nan tabata den un negociacion, pero despues di varios luna, a bin logra cu e ekipo di Romeo Santos habri un fecha exclusivamente unda a inclui Aruba como un di su ultimo fechanan di tour. Facebook live link https://24ora.news/3ZFyXgU
Asina ey Aruba un biaha mas por ta anfitrion di un otro artista di caliber internacional, unda hopi hende por disfruta di dje. Pero tambe p’e fanaticonan di Corsou, Boneiro, Colombia y demas bishitante cu kier mira Romeo Santos su presentacion na Aruba mes.
Segun Bermudez, nan ta kere den e producto turistico di Aruba, specialmente den concierto di caliber manera esun aki. P’esey Aruba Tourism Authority (A.T.A.) ta un partner esencial pa nan p’e concierto aki di Romeo Santos.
Ronella Croes, CEO di A.T.A., a expresa nan gratitud na e ekipo completo di Elite y tur colaborado p’e tipo di iniciativa asina. E tipo di iniciativanan aki cu ta inicia cerca nan como idea, ta traha riba esey y negosha. Despues ta bati na porta di A.T.A. y otro socio pa nan pensamento. A.T.A. ta mira e potencial den tipo di cos asina aki.
A.T.A. tin hopi experencia cu Elite, ya cu nan ta traha cu otro pa hopi aña riba diferente otro produccion. Croes a recorda cu nan tabata socio cu otro den pasado p’e evento di Aruba Island Take Over, y a conoce e socio mas di cerca. Tur proyecto ta evalua y Elite a mustra di por maneha di trece concierto di caliber riba nan mes. P’esey, ora a bati na nan porta, a tuma esaki serio manera otro potencial partido. E confiansa t’ey y ta gradici e esfuersonan cu ta inicia door di Elite.
Unabes cu e proceso asina encamina, segun Croes, nan ta mira e potencial di e artista, combinacion di esey, potencial di turismo. E ta duna plataforma na artista local, pa asina nan tambe por expone nan talento y reconoce tipo di concierto asina tin balor agrega pa comunidad. Despues di e pandemia, tipo di concierto asina aki no tabata organisa. Despues di a evalua, A.T.A. a dicidi di ta un partner n’e evento aki y a considera diferente aspecto, Croes a enfatisa.
Durante e concierto tin diferente opcion p’e publico scoge. Segun Bermudez, e biaha aki e publico presente por mira Romeo Santos di cerca. E anochi di dia 9 di december, tin diferente seccion di VIP, seccion di elite platinum, seccion di gold, na banda tin VIP di plata y brons. Nan a haya un formula pa percura cu e VIP standing y general ta hopi mas dilanti compara c’un concierto den exterior. E fanaticonan lo experencia e show completo di Romeo Santos hopi mas di cerca. No mester gasta placa pa bay experencia show di Romeo Santos den exterior, pero por disfruta di esaki pa mas o menos dos ora.
Rowald Werleman, representante di Tropical Bottling Co. y Brouwerij Balashi, a expresa cu nan ta sumamente contento y orguyoso pa forma parti di e magno evento aki. E idea a cuminsa rond di tres luna pasa y a busca diferente forma pa ta parti di e magno evento aki.
Loke a yuda ta cu Romeo Santos tin un background di Puerto Rico. E cas di Bacardi, esta Facundo, ta bin di Puerto Rico. Nan ta un di e partnernan di Tropical Bottling Co. y asina ey a haci e parti un tiki mas facil pa nan. Esey ta pone cu oficialmente nan ta un partner oficial di e concierto aki. Nan lo percura pa ta presente den e concierto cu e cerbesnan di Balashi, Chill, Magic Mango, sin lubida Bacardi, Grey Goose, Dewars 15. Werleman a gradici Elite Productions pa acerca nan y e ta sigur cu mas di shete mil hende lo ta presente n’e concierto aki.
Bermudez a informa esunnan cu kier haci nan reservacion pa nan mesa di VIP, por haci esey via nan website https://www.eliteempire.events/. E number pa tuma contacto p’e seccion di VIP ta 5693005. Un sorpresa special p’e concierto aki, nan tin un ‘one time only flash ticket sale’ di solamente un dia y na un cantidad limita cu prijs barata pa atende n’e evento aki. Esaki ta tuma luga diaranson awo n’e Pop Store situa bou The Venue.
