Durante su conferencia di prensa e ex-politico di Otmar Oduber a transmiti e preocupacion cu ta existi bou di pueblo riba e tema di scarsedad di tereno. Y lamentablemente, el a bisa, no tin un maneho dirigi pa yuda e Arubiano yega na su mesun cas awendia.
Te dia di awe, el a conta, hendenan ta yega cerca dje of mand’e mensahe relaciona cu e problema di scarsedad di tereno. Keto bay tin un scarsedad grandi di tereno pa vivienda aki na Aruba.
El a recorda con tempo e tabata minister, na 2018 / 2019, a introduci un maneho na Departamento di Infrastructura y Planificacion (DIP) pa reduci e peticionnan cu tin hopi aña para. Ta papia aki di peticionnan haci for di inicio di añanan 90. A logra yega te na e peticionnan di 2012, cu ta nifica cu a logra baha e peticionnan atras di 15 aña.
Debi cu tabatin asina hopi tempo cu a pasa, tin personanan cu a cay afo door cu yega tin edad halto y of no ta yega na remarca mas pa un financiamento.
Awo el a tuma nota cu e atraso a bolbe crece y ta parce manera cu “DIP ta den coma”. Lamentablemente no a sigui duna tereno y tampoco un vision pa DIP pa mira con ta yuda soluciona e scarsedad di cas na Aruba. “Scarsedad di cas ta pasobra tin scarsedad di tereno.”
