Aruba Softball Bond desde januari y februari tabata tin un serie di reunion preparativo tanto riba nivel di bestuur pero tambe cu clubnan miembro pa asina hunto prepara pa campeonato cu lo inicia 30 di april proximo.
Un total di 18 club a wordo representa durante e reunion extra ordinario di ASB den luna di februari y esaki reparti den diferente klas. Fecha cu a wordo stipula den conhunto ta 30 di april y e apertura lo tuma luga riba veld di Dragon Hitters ( x Duracell). Tin hopi planes pa softball e aña aki pero ta pendiente diferente desaroyo banda di softball pa por anucia esakinan.
Por ehempel Corsou a confirma di lo ta e host pa e clasificatorio femenino 8-14 di augustus proximo y Colombia a confirma pa host campeonato masculino CONSURSA na november di e aña aki.
Aruba Softball Bond banda di esaki ta trahando hopi di cerca cu Romar Trading pa por concretisa e pedido pa balanan di softball. Pedido mester a keda kla desde januari pero pa rasonnan conoci mayoria fabrica na China a cera desde januari y a ricibi informacion recien cu 3 di maart binidero gobierno ta permitiendo fabricanan cuminsa opera bek.
Esaki consecuentemente kiermeen cu balanan lo yega te final di mei. ASB ta bezig acumulando locual cu ainda tin pa start campeonato dia 30 di april. Alabes ASB lo intermedia pa trece balanan di baseball pa Aruba Little League. Esaki lo ta prome biaha pero ASB ta hopi contento di e sosten cu Romar Trading ta brinda na e deportenan di softball y baseball pa locual ta trata bala cu ta hopi esencial pa dicho deportenan.
Recordatorio cu 31 di maart ta e deadline pa un hungado por entrega su retiro di un ekipo pa otro dado caso cu el a hunga 2019 cu un otro ekipo y ta desea pa pasa pa un ekipo nobo e aña aki. Despues di e fecha no lo acepta peticion di retiro. Por fabor atleta y ekiponan tene bon cuenta cu esaki. Ban cuminsa prepara pa nos por tin un bunita campeonato 2020.
