Parlamentario Alan Howell riba maneho di FCCA: Yiunan tin “first choice” pa sigui huur cas

Parlamentario Alan Howell for di algun siman atras a presenta su preocupacion pa loke ta trata esnan bibando den casnan social y ta wordo saca den corto tempo despues cu nan mayor fayece.

Siman pasa el a reuni cu representantenan di FCCA den un reunion di Comision Fiho di Parlamento di Infrastructura riba e tema aki.

Despues di e reunion el a expresa cu e no a keda satisfecho y mucho menos contento cu e resultado di dje. Parlamentario di POR ta keda para enfaticamente riba e posicion cu mester por tin flexibilidad pa e yiu tin e ‘first choice’ pa sigui huur e cas. “Perde e cas y wordo poni riba caya ta inaceptabel pa mi. Pa e motibo aki mi a entrega un peticion oficial pa un reunion publico den Parlamento mas lihe cu ta posibel, invitando tambe e Minister di Infrastructura”, Alan Howell a duna di conoce. 

Meta di tin casnan social ta pa yuda esnan cu mas tin mester y un yiu cu semper di su bida a biba na un cas, cu ta pasando den e dolor di a perde su mayor, y riba dje wordo poni riba caya ta algo no solamente inaceptabel, pero tambe inhumano y ta bay totalmente contra maneho di Gabinete Wever-Croes unda ser humano ta central.

Pesey tambe Alan ta expresa cu durante e reunion publico, cual e ta spera lo tuma lugar hopi lihe, “nos ta bay wak ken ta para na banda di e pueblo humilde y no solamente ora cu ta eleccion nos hendenan humilde ta bira diripiente importante”.