Manera anuncia caba, diasabra awo dia 12 di december Aruba One Happy Island Lions Club ta organisa “Jingle Bells Charity Drive” na Plaza Betico Croes den Rumbastraat. Cu e recaudacion di fondo aki Aruba One Happy Island Lions Club lo yuda muchanan di famia den necesidad pa nan por ricibi un regalo pa e temporada aki.
E ayudo aki ta trece poco alivio pa famianan den menos recurso, pa e motibo aki nos ta motiva comunidad pa contribui. E miembronan y boluntarionan cu caha special lo tey den Rumbastraat pa ricibi e donacion, tur donacion ta yuda nos yuda e muchanan den necesidad. Ban haci nos muchanan contento pasobra tur mucha merece un regalo y den e tempo dificil cu nos a bin ta confrontando famianan den necesidad ta esnan cu ta wordo hopi mas afecta y sigur nos muchanan ta sufri e consecuencianan.
Un invitacion pa un y tur uni na e causa aki y pasa haci nan donacion diasabra 12 di december for di 1:00 PM pa 6:00 PM na Plaza Betico Croes, Rumbastraat. Lo tin e oportunidad pa cumpra saco di dushi cukinan di pasco (Christmas Cookies bags) y tambe lo tin na benta tapaboca comodo re-usabel den tur size, cual por wordo laba. Un bon regalo pa un ser keri keda protega den e temporada di fin di aña. Esunnan cu ta prefera di haci un donacion via banco por haci esaki na e cuenta na Arubabank 6005880190 Aruba One Happy Island Lions Club menciona Jingle Bells Charity Drive.
Pa mas informacion y pa sigui e evento sigui Facebook page di Aruba One Happy Island Lions Club. Hunto lo logra haci muchanan di famia di menos recurso contento. Ban duna un man y haci bo donacion, tur ta yuda.
