E no ta naci na Aruba, sino na Rotterdam, Hulanda dia 18 di april 1996 (26). Pero tata di Denzel Dumfried ta Rubiano y mas cu tur cos, un Dakotera “de pura sepa”. Como defensa di e ekipo Hulandes, Denzel a a asisti den dos gol, mientras cu e mes a anota un di e tres golnan cu a hiba Hulanda na victoria y cu pase automatico awor pa cuarto di final den e Copa Mundial di Futbol 2022 cu ta tumando luga na Qatar.
Denzel Dumfries como tal tin sanger Rubiano y ta un futbolista profesional. Aña pasa el a firma un contract cu Internazionale, nan a paga 15 miyon Euro p’e. Mester menciona cu na aña 2014 ainda Dumfries a hunga pa e seleccion nacional di Aruba den wega internacional. El a hunga algun wega pa Aruba pero no kier a participa den un cambio oficial “interland” pasobra e kier a mantene su portanan habri pa drenta e seleccion nacional di Hulanda. Y el a logra..te cu 8 aña despues, at’e ta hunga como un di e miho hungadonan di e ekipo color oraño.
Durante e wega di awe, apenas na cuminsamento caba, na di 10 minuut di wega, Denzel Dumfries a traha un hugada y a pasa e bala pa Memphis Depay cu a anota e prome gol di wega, hibando Hulanda ariba cu score di 1-0. Esey no tabata tur, pasobra den pito final di e prome tempo, na di 45+1 minuut di wega, ata Denzel Dumfries ta traha un otro hugada perfecto y ta pusha e bala dilanti pia di Daley Blind cu a probecha y a anota e di dos gol di wega, pa Hulanda. Na di 60 minuut a cay carchi geel pa e Hulanda, Teun Koopmeiners. na di 76 minuut di wega, Christan Pulisic a traha un hugada y a pasa e bala pa Haji Wright cu a anota e di tres gol di wega, pero e prome pa e ekipo di Merca, hibando e score na 2-1. Y aunke tabatin hopi intento banda banda di veld, na di 81 minuut, Daley Blind a traha un hugada perfecto y cu un pase largo pa e otro banda, Denzel Dumfries a yega topa cu e bala y cu un skop fuerte a manda e bala pa gol, anotando e di cuater gol di wega, cambiando e score na 3-1. Mester menciona cu na di 87 minuut atrobe a cay un carchi geel, pa Hulanda atrobe, e biaha aki Frenkie de Jong. E wega a caba na final 3-1 pa Hulanda.
Awor lo mester warda e wega di Argentina y Australia pa mira ken Hulanda lo enfrenta diabierna awor den e wega di cuarto final. Manera ta conoci, asina cu Hulanda pasa pa octavo final caba, e atencion na Aruba y den tur otro pais den Reino Hulandes ta aumenta. Pa e wega di diabierna awo lo ta interesante pasobra nos Rey ta casa cu un señora di Argentina. Pues e wega Hulanda contra Argentina lo yega t’e cas Real….pasobra cada un lo ta pa su pais natal.
Aki na Aruba mester menciona cu Argentina ta masha popular tambe, mescos cu e ekipo di Brazil. Fanaticonan ta masha pendiente pa e resultado pa mira ken lo hunga contra ken. Echo ta cu den e weganan aki, esun cu perde ta bay cas mesora y esun cu gana ta avansa. Ya no ta asunto di punto mas pa toch keda na bida den e Mundial di Futbol. E miho hungadonan di tur pais ta den un bataya grandi, den e mundial di mas caro den historia, cu gastonan cu a surpasa 220 biyon Dollar Mericano.
Pa loke ta audiencia, e campeonato mundial aki ta kibrando tur record di e ultimo esta na 2018. Ya caba por bisa cu e wega entre inglatera y Merca a kibra tur record di sintonia nacional pa un wega di futbol di hende homber, den e continente Mericano. Ta estima cu 19.65 miyon televidente a mira e wega na Merca via e canal Fox TV. Su mañan tabatin e wega entre Argentina y Mexico, transmiti pa Telemundo, cu a kibra record di sintonia nacional na Merca, pa un wega di mundial di futbol transmiti den e idioma Spaño. Y e tabata e di dos wega di futbol mundial miho mira na Merca tambe.
FIFA mes ta anticipa cu e aña aki, e Copa Mundial di Futbol lo sigui domina y keda como e deporte mas mira na television. Ta estima cu na final di e campeonato, cu 5 biyon hende na mundo lo a mira e weganan aki.
