Diabierna ultimo a tuma luga e final di e careda di Rok Cup Panamerican 2021. E competencia a tuma luga na Cajicá, Colombia. Cajicá ta un municipio cerca di e capital di Colombia, esta Bogota. E ta keda mas of menos un (1) ora leu for di e capital. Ta rib’e pista di Autodromo XRP e organisacion di Rok Cup a tene e evento mas grandi di aña, Panamerican. E evento di Rok Cup Panamerican a conta cu participacion di varios pais, entre otro, Ecuador, Panama, Colombia, Corsou y tambe Aruba. Principalmente e evento mester a tuma luga na Villavicencio, Colombia, pero debi na e cifra halto di contagio di Covid-19, e organisacion a opta pa hacie na Bogota mes.
Christopher Arends ta un di e pilotonan mas prominente di Aruba y e tambe a competi den e evento aki. Arends hunto cu su tata, ruman y su amigo a yega Colombia dos siman pasa. Nan a opta pa yega un poco mas trempan p’asina ta bon prepara p’un evento asina importante. Durante e careda final, Arends a conta cu un otro piloto a hung’un wega sushi cu ne. E tabatin tur e capacidad y velocidad pa gana e careda. Den pasado Arends a yeg’i titula campeon caba den su categoria. Durante e prefinal di diahuebs ultimo, el a sali na prome luga, pero pa e final, nan a push’e y sac’e afo. Su nomber y su pais di origen ta conoci pa mayoria Colombiano cu ta forma parti di e famia di Rok Cup.
E piloto Arubiano mas a leu conta cu un resultado asina ta dun’e mas forsa p’e sigui competi den mas careda internacional. Ta locual e tin pensa di haci tambe na november proximo na Las Vegas durante e evento di Rok Cup USA. Por spera mas di Christopher Arends, el a sigura cu, unda cu e bay, e ta hiba e bandera di Aruba paso: “Arubiano mi ta”, asina Arends a bisa na final.
