Minister Ursell Arends, responsabel pa naturalesa di Aruba a ricibi e “Aruba Bird Calendar 2022” for di Greg Peterson di Fundacion Aruba Birdlife Conservation. Esaki lo ta e di diescinco aña cu Aruba Bird Life Conservation ta publica e “Aruba Birdlife Calendar.”
Un biaha mas, no menos cu nuebe (9) fotografo di naturalesa a contribui cu nan potretnan di parha. Nan ta Damilice Mansur, Ross Boss Wauben, Peter Sprockel, Albert Peterson, Michiel Oversteegen, Michael Tromp, Patrick Peña, Glenda Tromp y Greg Peterson.
E calendarionan ta obtenibel pa 12,50. E entradanan ta pa e fundacion uza pa e propositonan di conservacion. E president di e fundacion Aruba Birdlife Conservation a keda hopi contento cu e calendario nobo y hopi agradecido na tur esunnan cu a duna nan contribucion.
E entradanan lo wordo inverti den e proyectonan di conscientisacion y conservacion di naturalesa. Un di e proyectonan conoci na Aruba cu lo destina fondo na dje lo ta e “Proyecto conservacion di Shoco”, unda lo instala neishi artificial pa mehora e posibilidad di procreacion di e Shoco di Aruba endemico cu ta core peliger di extincion. Tambe ta trahando riba un website cu informacion di parhanan di Aruba.
Donacion tambe ta hopi bonbini y por haci esey na nomber di “Foundation Aruba Birdlife Conservation”, Aruba Bank N.V., riba number di cuenta no.2402860190.
Leyenda
Minister Ursell Arends ricibiendo e kalender di Greg Peterson di Aruba Birdlife Conservation.
