Desde dje atake cometi riba e bishitante crucero Sarkis Gitani, autoridad a traha fuerte pa por a detene esunnan cu a comete e acto aki. Polis a detene cuater persona, di cual tres tabata envolvi den e caso di maltrato y un ta e mama. Pero falta un atacado ainda.
Nathalie Racine, casa di Gitani, ta sigui di cerca e caso. El a informa na nos di 24ora di ta contento cu a detene e personanan aki, pero ta preocupa pasobra tabatin un di cuater sospechoso cu falta pa detene. Nan ta mustra di ta bin di mesun origen, comunidad of famia. Incluso a bis’e cu ta kere e persona tin un pasado criminal. E ta haya cu tabata algo bon cu porfin a detene nan.
El a conta riba e parkeerplaats unda a ataca su casa tabata scur y esunnan cu a comete e acto a pone nan T-shirt riba nan nanishi. Pero e ta mas facil pa su casa reconoce e bosnan. Pa awo Gitani no por papia ya cu ocho pa diesdos luna of mas e lo ta asina y por come solamente via likido. Racine a reitera cu ta un posibilidad cu Gitani por reconoce bos di esunnan cu a atac’e pa mat’e. Segun Racine, un persona cu a pasa a stroba nan, pasobra e forma con e atake tabata tuma luga esey lo tabata e caso.
Proceso di recuperacion
Pa loke ta e recuperacion Sarkis ta ricibiendo remedi y e dolor ta increibel. El a splica cu cada weso dje cara di su casa ta fractura, esta di e wowonan bin abou. E no por bisa si a pone metal n’e cara, pero henter curpa di Sarkis ta blauw. E ta bou remedi, ta haya morfina cada cuater ora. Incluso nan a cuminsa hisa e cantidad di dosis, pasobra e dolor ta inmenso.
Nan no sa si lo keda daño permanente, pero henter esaki ta un nachtmerrie. “Nos no kico ta siguiente. Nos no sa pa cuanto tempo e no ta traha. Ami mester cuid’e. Nos yiunan ta traumatisa, nan a mira nan tata yega cubri den sanger. A regresa den e barco unda nos no a haya yudansa”, el a comenta.
Pa mas lesa TREMPAN.COM.
