Riba Diabierna 1 di September a celebra Dia di Prensa aki na Aruba. Esaki tabata un bunita ocasion pa reflexiona riba e trabao importante cu prensa ta eherce den un comunidad.
Prensa ta comunica, informa, educa, di crea consciencia y genera opinion publico. Prensa tambe por trece entretenimento, arte, cultura, crea balornan den un ser humano.
Ta p’esey cu Aruba Bank tur aña ta honra e miembronan di prensa di Aruba, ya sea cu un regalo of un evento special pa asina bisa nan danki pa e trabao cu dia y anochi nan ta desplega den nos sociedad.
E aña aki Aruba Bank a realisa, manera custumber, un “media tour” unda a entrega na diferente representante di nos medionan di comunicacion un mata chikito como muestra di aprecio. Aruba Bank kier pa prensa yuda tene e mata aki bunita y cuid’e mescos cu e trabao cu nan mes ta realisa tur dia.
Aña pasa, a scoge pa tene un “Press Day Happening”, pero e aña aki, ademas di e mata bunita entrega, e miembronan di prensa a haya e oportunidad di gana un biahe pa New York.
Pa esaki nan mester a saca un potret cu nan regalo. Post e potret riba Facebook y laga nan siguidonan sa con cu nan trabao den prensa nan ta haci un diferencia den nos comunidad. Mester a uza e hashtag #ABPressDay y share e potret. E miembro di prensa cu mas “likes & shares” lo por a gana e biahe pa New York City.
Mesora por a mira un entusiasmo enorme y asina mes e potretnan a cuminsa aparece riba Social Media.
Un biaha mas, Aruba Bank ta felicita prensa di Aruba riba nan dia y ta encurasha nan pa sigui haci e un trabao importante aki na servicio di nos comunidad.