Diabierna ultimo dia 1 di September CITGO Aruba Refinery a inicia trabounan detaya di inspeccion den planta, un paso crucial cu CITGO Aruba y su partnernan a bin ta traha pe durante e ultimo lunanan. E contratista principal pa e inspeccion ta YTT, cu ta un consorcio forma pa Technip France y Y&V Ingeniería & Construcción.
Desde cu a firma e Acuerdo di Servicio di Constratista Principal riba juni 15 e partnernan den e projecto cu ta inclui CITGO Aruba Refinery, CITGO Project Management Team, e consorcio YTT y demas contratista y subcontratista local ta trahando duro pa completa e planificacion y preparativonan necesario pa logra e paso crucial aki.
“E anuncio cu e projecto aki ta sigui mane planea ta excitante pa CITGO Aruba y nos partners”, asina Jose Pereira, Presidente den Funcion y CEO di CITGO Petroleum Corporation, y Director di CITGO Aruba Holding, LLC. a bisa. “Awor e servicionan di subcontratista pa CITGO Aruba ta cuminsa. Esaki lo sigura cu nos lo drenta e siguiente fase di e projecto na un manera exitoso den cua nos mester keda duna e mihor di nos mes pa sigura e mihor procesonan y e teamnan cu mas capabilidad. Tambe ta asina cu nos ta compromete nos mes na ehecucion di cada fase di e projecto na e manera mas socialmente responsabel”.
E fase inicial aki lo ensera, ademas di trabounan di inspeccion, trabounan di reparacion riba equipo cu prioridad halto, percura pa order e items cu tempo largo di entrega, como tambe ehecucion di partinan inicial di varios projecto di inversion grandi y di medio ambiente pa e rehabilitacion y startup di e refineria pa produci crudo mehora. Inspeccion lo percura tambe pa informacion detaya pa sigui specifica y finalisa e descripcion di projecto y e presupuesto di Clase II.
Representante di Consorcio y Director di Projecto di YTT, Alejandro Carvallo a bisa cu e refineria ta un parti integral di e isla cu a trece crecemento y beneficio pa e pueblo di Aruba desde su inauguracion na 1929. “E la wordo sera parcialmente 5 aña pasa y awor e ta wordo rehabilita pa wordo opera como mehorador di crudo pa procesa crudo pisa. E Acuerdo di Servicio di Constratista Principal pa e projecto di mehorador di CITGO Aruba Refinery su meta ta pa percura pa e servicionan cualifica di ingenieria, compra, maneho di projecto y di subcontratista rekeri pa e descripcion di trabou di e rehabilitacion di e refineria”.
Cada dia tin mas progreso y nos ta mas cerca di e reactivacion completo di CITGO Aruba Refinery. Na momento cu e ta operacional e expectativa ta cu e facilidad lo trece varios beneficio socio-economico pa Aruba. Ya caba e facilidad ta emplea alrededor di 500 persona, incluyendo empleado di CITGO Aruba Refinery y contratista, y e number aki lo sigui crece constantemente den e siguiente siman- y lunanan nos dilanti cu progreso di e projecto.
Tocante CITGO Aruba CITGO Aruba Refining N.V. (CAR) ta un compañia Arubiano cu ta forma parti di un grupo di compañia operando bou di PDV Holding Inc., doño indirecto di CITGO Petroleum Corporation y subsidiario di Petróleos de Venezuela, S.A., e compañia nacional di petroleo di e República Bolivariana di Venezuela. CAR ta e operador di e refineria di Aruba, situa na San Nicolas, Aruba cu ta propiedad di Refineria di Aruba N.V. (RdA), un entidad di cual Gobierno di Aruba ta propietario absoluto.
