Riba diahuebs dia 22 di april 2021, Aruba Aloe a ricibi e certificado y e Decreto Real for di Gobernador di Aruba, Su Excelencia Alfonso Boekhoudt, cu ta pertenece na e Predicado Real (Predicaat Koninkljk) otorga pa su mahestad Rey Willem-Alexander na e compania Rubiano, Aruba Aloe Balm NV. For di awe, Aruba Aloe mag di añadi e titulo Real na su nomber y e corona Real na su logo.
E adicion aki ta simbolisa e respet, admiracion y confiansa di e Rey pa e compania cu ta ricibi’e. Un di e condicionnan pa un
compania por ricibi e honor aki ta cu e mester tin un importancia nacional y e mester existi por lo menos 100 aña.
Na 1890 Cornelis Eman a cuminsa cu e comercio di Aloe Vera, despues di cual Casey Eman, Jani Eman y finalmente Henny Eman a continua cu e negoshi. Famia Eman a caba ta dirigi e compania pa 110 aña y a transforma e compania di un empresa comercial den un compania cu ta bende producto pa cuido personal na unda e uzo di 100% gel puro di Aloe Vera cosecha di e cunucunan Rubiano, semper tabata central.
Na e aña 2000, Louis A. Posner a tuma e encargo di e compania for di Henny Eman y a inverti pa desaroya e compania na nivel internacional y pa engrandece e “footprint” di e compania localmente. Na 2014 Onno Jr. van Romondt a uni su mes na e compania como e di dos accionista pa asina hunto nan sigui expande Aruba Aloe.
Mientrastanto, Aruba Aloe tin 15 tienda ariba nos isla y productonan traha den e fabrica ta wordo exporta pa mas di 55 pais rond di mundo y ta wordo bendi den mas cu 15,000 tienda na Merca. Tur esaki for di e facilidad di produccion Rubiano na Hato.
Managing Director Remko van der Veldt ta comparti: ”Esaki ta un momento historico pa Aruba Aloe y pa Aruba. Ta haci nos sumamente orguyoso, cu Aruba Aloe ta e prome compania den e parti Caribense den Reino cu a ricibi e derecho di su mahestad Rey Willem- Alexander di por hiba e Predicado Real. Pa esaki tambe nos kier gradici en especial Gobernador di Aruba, como representante di e Rey, pa otorga e derecho pa por hiba e Predicado Real.”
Van der Veldt ta continua: ”Den e ultimo 130 aña e compania a enfrenta ups- y-downs, pero cu pasion, compromiso y orguyo Rubiano, semper nos tabata tin e pleno conviccion cu Aruba Aloe tin un gran futuro su dilanti. E conviccion aki tabata presente cerca tur e generacionnan Eman cu a dirigi e compania, tur e empleadonan cu a yega di traha na e compania durante e añanan, como serca e doñonan y empleadonan actual!”
Cu e Predicado Real Aruba Aloe ta forma parti di un grupo di compania cu ta carga e titulo Real manera Shell, KLM, KPN y e Royal Schiphol Group, pa menciona algun ehempel. E doño Louis A. Posner ta bisa tocante di esaki: ”Ta un honor pa para banda di e compania grandinan aki. Nos kier demostra cu e compania Aruba Aloe, un compania (di un isla chikito) por bira un empresa cu ta opera globalmente. Tempo cu mi a tuma encargo di e compania na e aña 2000 mi a describi esaki den e siguiente manera; Locual Coca Cola ta pa Merca y Heineken pa Hulanda, esey ta locual Aruba Aloe lo mester bira pa Aruba”.
Naturalmente nos mester celebra e momento historico aki na grandi. Van der Veldt: “Nos lo bay celebra e fiesta aki cu nos clientenan y Aruba mas laat den e aña, ya cu e situacion actual pa cu Covid-19 y su medidanan corespondiente ainda ta na vigor. Na su debido tempo Aruba Aloe lo manda un comunicado tocante di esaki.” Pa clausura Van Der Veldt ta bisa:”Desde awe nos no ta Aruba Aloe mas pero nos ta de Koninklijke Aruba Aloe, un compania orguyoso Rubiano”.
