Na Boneiro a tuma luga e Weganan Eskolar Interinsular. Despues di shete aña, ta spera cu esaki lo por ta un inspiracion pa haya mas hungado. Mildred Wever, coordinado di deporte na IBiSA, a duna di conoce cu despues di shete aña ta tumando luga e Weganan Eskolar Interinsular entre Aruba, Boneiro, Corsou. Saba no a logra participa e aña ‘ki pero lo prepara pa participa otro aña.
A cuminsa bek cu e deporte di dam y schaak. Cuater mucha muhe y cuater mucha homber a forma parti di e ekipo pa weg’i dam y cuater mucha muhe y cuater mucha homber a forma parti di e ekipo pa schaak. E grupo di edad ta di 2010 cu 2011.
Na Aruba a organisa competencia di deporte escolar y e ganadonan ta esunnan cu a gana e derecho di representa Aruba na Boneiro, asina e dambond como tambe e schaakbond por haya mas hungado. Despues di e weganan interinsular aki ta spera cu esaki continua y no stop mas pasobra e ta algo bunita.
DEPORTE TA IMPORTANTE
E muchanan ta crece den e deporte pero tambe como persona. Dia 23 pa 26 di maart lo tin interinsular na Corsou cu e ekipo di trefbal tambe lo tin atletismo escolar. Na Aruba, dia 21 cu 22 di april, lo tin volleybal di mucha homber y futbol di mucha muhe. E biahe pa Boneiro tabata posibel door di IBiSa y Gobierno di Aruba.
ARUBA PRESENTE
Presidente di Parlamento, mr. Edgard Vrolijk, a presencia e apertura di e Weganan Eskolar Interinsular. El a comenta cu despues di shete aña e competencia ta bek. Vrolijk a ricibi e invitacion y despues a haya aprobacion pa su biahe. Semper, como docente, el a participa den e hopi wega interinsular y awo el a hiba palabra den e apertura. El a duna di conoce cu e muchanan a expresa di un manera hopi bunita. “E muchanan ta express, e muchanan ta duna un sentimento hopi bunita pa locual nos grandi mester siña for di nan”, mr. Edgard Vrolijk a
comenta.
El a continua bisando cu e mensahe di union tabata hopi cla aya na Boneiro. E weganan a keda pega pa motibo di e conexion entre e islanan tabatin algun interupcion como tambe e cambio den constelacion entre e islanan BES y CAS. Edgard Vrolijk a comenta cu e factor financiero tambe a hunga un rol y e ta contento cu a logra pone placa pa esaki pasobra esaki ta un prioridad.
BONEIRO SATISFECHO
“Mi ta sinti mi sumamente contento cu despues di hopi aña nos por a inicia e weganan interinsular”, tabata expresion di James Kroon, Diputado di deporte y infrastructura (UPB). Diputado Kroon a sigui bisa cu ta durante e weganan e hobennan ta siña conoce otro. Durante un weekend largo nan a haci deporte caminda nan a siña conoce otro y alabes intercambia informacion. Na momento cu a tuma contacto cu Aruba, Corsou y Saba a logra regla tur cos lihe. Pa James Kroon, deporte mester haya un rol mas importante den bida di cada un.
