E siman aki a tuma luga un reunion di e Comision di Guia cu ta na cabes di e trabounan cu ta haci na Aruba pa mantene e sistema financiero di Aruba liber di labamento di placa y financiamento di terorismo.
Pa e reunion aki tabata presente tambe prome minister Wever-Croes, minister Bikker y minister Maduro. Aruba ta den pleno preparacion pa e evaluacion door di Caribbean Financial Action Task Force on money laundering (CFATF) di e sistema pa preveni y combati labamento di placa y financiamento di terorismo. E evaluacion lo tuma luga cu un ‘onsite visit’ den luna di augustus 2021 y e comision di Aruba ta trahando duro pa asina por demostra e esfuersonan cu ta haci pa por mantene e integridad di e sistema financiero di e pais.
Dentro di poco e Comision di Guia lo reuni cu tur ‘stakeholders’ pa asina presenta e resultado di e ‘National Risk Assessment’ (NRA) cu a keda compila danki na e ‘input’ di varios instancia. E NRA lo bay desemboca den un strategia pa asina por preveni y combati labamento di placa y financiamento di terorismo na un manera mas efectivo na Aruba.
