Conseho di Minister di Reino kier pa Prome Minister Marlin di Sint Maarten bay mas pronto posibel. Gobernador di e isla a haya ordo pa retir’e, por medio di un KB.
Conseho di Minister di Reino a dicidi cu mientras cu Marlin tey, e pago di e ayudo financiero Hulandes ta stanca. Tin un fondo Hulandes di 550 miyo Euro pa e reconstruccion di e isla despues di horcan Irma.
Secretario di Estado pa relacionnan di reino, Knops ta yama e ordo na Gobernador como “un medida severo”, cu no a wordo “tuma lichtzinnig”, pero a bisa cu Conseho di Minister di Reino, no a mira ningun otro posibilidad.
Na comienso di November, William Marlin di 67 aña di edad, a wordo retira dor di Parlamento di Sint Maarten, pero aparentemente no a haci caso. Indicacion di un cantidad di mocion di desconfiansa ta pa motibo cu Marlin no kier a bay di acuero cu e condicionnan cu Hulanda a propone na momento di otorga e ayudo. Un di e condicionnan ta pa institui un “integriteitskamer” cu ta tira bista cu e placa lo wordo bon gasta.
Segun Knops Marlin ta viola un regla basico di e derecho di estado door di keda sinta, mientras cu e no ta disfruta di e confiansa mas di parlamento. “E ta simplemente serio.” E ta haya cu e politico a pone su propio necesidadnan na prome luga na luga di e pueblo di Sint Maarten.
Conseho di Minister di Reino ta consisti di e gabinete Hulandes y e Ministernan Plenipotenciario di Aruba, Corsou y Sint Maarten. Tambe e representante di e Ministerraad di Sint Maarten ta di acuerdo cu e ordo, segun Knops. “E ta un decision unanime.”
Conseho di Minister di Reino ta haya cu mester bin un sucesor mas pronto posibel, cu si tin e confiansa di Parlamento. E ora por cuminsa efectua e pagonan for di e fondo di ayudo. Knops ta spera cu esaki por sosode mas pronto posibel. El a mustra cu dos siman pasa, e gabinete Hulandes ya a dicidi pa cuminsa cu e fondonan di emergencia, pero no prome cu tin un bon gobernacion bek.
“Mi ta spera cu e medida aki por haci cu e retiro por wordo tuma, cu e Prome Minister por baha, y pa asina nos cuminsa mas pronto posibel otorga e fondonan di emergencia, pasobra e ta hopi necesario pa yuda e comunidad di Sint Maarten.” Te asina leu e pagonan ta suspendi.
Den un otro rosea, Minister Plenipotenciario, Guillfred Besaril a comenta na nos mesa di redaccion cu absolutamente e no a vota pa e KB cu a wordo imponi riba St. Maarten, esaki contrario na loke cu Secretario di Estato Knops a anuncia mas tempran. E minister di St. Maarten si a vota pa asina pone e KB.
E reunion aki tabata e prome reunion cu minister Besaril a asisti, despues cu el a yega Hulanda pa cuminsa cu su labornan como minister.
