Dia 22 di November di aña pasa tabata tin un caso caminda cu varios persona den un famia, incluyendo un wela, a bira victima di venenamento. Esaki a tuma luga door cu un miembro di famia, un hoben e tempo ey di apenas 15 aña, naci na Jamaica, a benta veneno di djaca den orange juice.
Miembronan di famia cu a bebe e juice a bira hopi malo y hasta a bay mas leu cu e wela di e famia a fayece. E hoben aki na prome instante a bisa cu e no ta corda y no sa con e veneno a bin den e juice, pero despues di varios material audio visual, a confronta e hoben aki,kende na final, a dicidi di basha abao y admiti su culpabilidad. Un aña despues, hues a dicta sentencia riba e caso aki, na e condena maximo stipula pa ley di castigo pa menor di edad, cual ta un aña, cual castigo por wordo apela pa defensa di e hoben ainda dentro di un termino di dos siman.
Durante e proceso, hues a indica cu 2 otro persona, fuera di e wela, a consumi e orange juice venena, sinembargo ta e wela ta esun cu tabata tin un desenlace final, pa motibo di complicacion di salud. Apesar cu e defensa ta insisti cu no tin conexion cu e bebida venena y e deterioracion den e salud di e wela, hues ta conexta e dosnan aki cu otro.
Awo tin cu bay warda wak si defensa di e hoben aki, kende porcierto ta wardando riba su permiso di estadia na Aruba, ta apela e decision di hues y lo sigui cu e caso aki.
