Ministro di Sint Maarten sr. Michael Somersall a habri un exposicion di algun artista famoso di Aruba, Korsow y St. Maarten, na ARToMoNDo, den centro di Deventer.
Despues di un presentacion den Kabinet di Ministro Plenipotenciario di St. Maarten na Den Haag y e prome exposicion na Delft, e exposicion especial aki por ser admira na ARToMoNDo, Nieuwstraat 20, te cu 16 di maart.
E pintornan cu ta expone: Sir Roland Richardson (www.rolandrichardson.com), Tess Verheij (https://artistsofstbarth.org/collections/tess-verheij), Melvin Anderson (www.melvinanderson.com), Bikkel (www.bikkelartist.com) y Gustave Nouel (www.gustavenouel.com) ta ser considera entre e artistanan mas conosi y/o internacionalmente reconosi di parti di nos Reino den Caribe. Speranza ta cu despues di e cooperacion aki entre artistanan famoso di Aruba, Korsow y Sint Maarten, e iniciativa lo crece cu mas artista y disciplina di Arte. E exposicion aki cu lo biaha den henter Hulanda lo purba habri porta pa esaki.
Annex tin oportunidad pa bishita un exposicion di ‘Pintura di Oranje’ di e pintor GN, cu ta biba na Deventer, den ‘De Ontmoeting’ net dilanti di‘ARToMoNDo’, na Nieuwstraat 19-21.
Después di un bon bini di sra. Marianne de Bakker di ‘ARToMoNDo’ y sr. Albert-Jan van Cloo di ‘De Ontmoeting’ y un discurso di President di Stichting Oranjefeesten Apeldoorn/Dutch Orange Company BV, sr. Simon Boon, e Loco-burgemeester y Wethouder di cultura na Deventer, sr. Carlo Verhaar a duna bon bini na e delegación di Sint Maarten. Despues e exposicion a ser inaugura oficialmente pa Ministro sr. Michael Somersall, na nomber di Minister Plenipotenciario di Sint Maarten. Despues di 16 di maart, e obranan aki lo ser exponi prome na Den Haag y finalmente na GROTE KERK di Apeldoorn.
Fin di 2017 Sint Maarten a ser destruí pa orcan Irma, e orcan más desastroso di su historia.
Na Apeldoorn, riba Koningsdag 2018, e ‘Estafette di Artre & Cultura pa parti di Reino Sint Maarten’ a start, pa juda e sector cultural di Sint Maarten.
Un initiativa di Stichting Oranjefeesten Apeldoorn / Dutch Orange Company BV hunto cu gobierno di Sint Maarten y algun artista famoso di Caribe. E iniciativa bunita aki pa juda e sector cultural di Sint Maarten por a conta cu apoyo di diferente autoridad, manera KBOV (Koninklijke Bond van Oranjeverenigingen) y varios sponsor, manera Royal Talens cu a regala un cantidad considerabel di material di arte na sector cultural di Sint Maarten. Un posibel fase 2 lo no focus mas riba ayudo, sino riba ‘cooperación cultural’ entre Aruba, Korsow y Sint Maarten na Hulanda, si política permiti esaki.Posiblemente Sint Maarten lo bira un ehempel di con algo hopi negativo por ser canalisa den cosnan hopi positivo pa henter nos Reino!
