Diasabra anochi a tuma luga e wega di futbol di Division uno entre e ekiponan Sportboys y RCS na Stadion Frans Figaroa na Noord. Apenas algun minuut iniciando e wega, e hungado di Sportboys Alex Wernet cu ta Polis y actual chauffeur di Minister, a haya carchi geel pa urina riba veld. Den di dos mita e mesun hungado a haya carchi atrobe pa un infraccion, cu a bira cora y mester a bandona wega. E no a keda contento y a menasa e hungado di RCS cu si e no sa ken e ta y cu e lo laga cer’e.
Wel parce cu e menasa no a cay den bon tera cerca e hungado di RCS, S. Gordon, cu ta yiu di Comisario di Polis Gordon. A start un problema riba veld pero cu referee a logra controla. Sinembargo Wernet no a bandona stadion mesora y e dosnan a topa atrobe na final di wega banda di kleedkamer.
Pafo, e Polis Wernet a sali y a avisa su coleganan cu Gordon ta busca problema cune. Claro cu no a avisa cu el a menasa e hungado di San Nicolas paden, ni tampoco cu e ta esun cu a haya carchi cora.
Pafo Polis a atende cu Gordon, cu tabata masha rabia y no kier a rasona. E hungado contrincante obviamente a “set” e “up” y e no por a kere su wowonan cu berdad Polis a bay over na detene. E no a bay facil y Polis mester a uza poco forsa den e proceso di detencion. Un amigo di Gordon, cu a purba splica e Polisnan cu esaki ta un set up, tambe a keda deteni.
Na final di wega Wernet a sali bay trankil, yuda pa su coleganan, mientras e hungado di RCS, yiu di Comisario di Polis, a bay Warda di Polis na boei hunto cu un menor di edad mas. Ey a scuchanan y por a bay cas.
Wernet tabata den noticia aña pasa caba na februari ora su pareha a acus’e publicamente di abuso domestico. Prome cu esey e tabata envolvi den e investigacion di supuesto ladronicia di ekipo di Bestuurskantoor den cual como Polis, a hunga un rol masha dudoso y cuestionabel. Mas bien a abusa di su poder como Polis pa forsa un ilegal duna declaracion falso a cambio di permiso di estadia na Aruba. At’e den problema atrobe pa comportacion agresivo y mal uzo di poder. Ta un patronchi cu tardi of trempan lo hink’e den problema!
