Seis aña pasa, Andres Perez, un artista procedente di Spaña, a crea arte riba glas pa e oficinanan di MetaCorp. Pero, cu tempo a bira necesario pa un renobacion. Pa cu esaki a haci uzo di ‘tempered glass’ di mey inch y riba dje a pinta varios diseño. Cada un di e cuater diseñonan, ta conta un poco tocante e historia di MetaCorp y con e compania a cuminsa te cu dia di awe.
Ademas di renoba e diseño, a mehora e proteccion final di e diseñonan riba e glas aunke cu e diseño mes ta haci mescos cu seis aña pasa. Originalmente, e prome ideanan di Andres tabata den color pero Eduardo de Veer a prefera e concepto di blanco cu preto mirando cu e ta un diseño artistico y e ta sinta bon n’e oficinanan. Asina mes a haci varios den color, por aprecia esaki na momento cu subi trapi pa bay e oficinanan. E diseñonan ta pinta na man riba glas.
Sin duda e insipiracion di e proyecto aki ta di Eduardo de Veer mes, mirando cu Andres Perez conoce Eduardo y e storia familiar ya pa hopi aña caba. Esaki a pone cu a yega na mas idea cu ta representa tur locual e sa di e negoshi.
“Mi semper lo tin un debe cu Eduardo de Veer, semper pasobra fo’i 20 aña cu nos conoce otro, e semper por a conta cu mi pa tur proyecto artistico tanto profesional como personal y claro cu ta mas cu un placer pa ehecuta cualkier proyecto cu tin di haber cu Eduardo de Veer”, tabata palabra di Andres Perez.
MetaCorp ta existi desde aña 1920 caba y a start den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den APEX y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi. E compania a sigui desaroya cu apertura di New York Laundry y EcoGas.
MetaCorp ta e empresa comercial mas bieu na Aruba cu mas din100 aña di existencia continuo. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talento manera Eddie de Veer y Guus Slabbekoorn na cabes di e compania.
