Dia 2 di december ultimo, artistanan Edjean Semeleer y Chris Kross a representa Aruba durante un evento di gala cu a tuma luga na Embahada di Reino Hulandes na Washington D.C.
International Club of D.C, un organisacion cu ta conta cu mas di 47 mil miembro, a organisa e evento aki. Cada luna e miembronan ta haya e oportunidad di experencia e concierto-, festival- y eventonan extravagante di gala cu ta expone cultura di paisnan rond di mundo. Asina e miembronan por haya un experiencia cultural di cada pais y motiva pa bishita e pais ey como turista.
Locual cu ta hopi importante pa International Club of D.C. ta pa expone su miembronan na paisnan cu ta enfoka riba durabilidad, innovacion y desaroyo sostenibel, ya cu ta esaki nan miembronan ta hopi interesa den dje.
Diabierna 2 di december a toca turno na Aruba. Den aliansa cu Ministro Plenipotenciario di Aruba na Washington D.C., Joselin Croes, Embahada di Reino Hulandes y tambe Aruba Tourism Authority, e evento aki por a bira un realidad exitoso.
Durante e evento, esunnan presente por a disfruta di un cena magnifico cu cuminda tradicional di nos isla, incluyendo pasabocanan gusta pa nos localnan. E parti cultural y musical tabata den man di Edjean Semeleer y Chris Kross cu a percura no solamente pa presenta Aruba su musica y generonan musical diverso, pero Edjean cu a wordo nombra como Aruba su “Guru Cultural” durante e anochi aki, a splica den detaye di nos baluartenan local, nos tradicionnan, nos bailenan, nos idioma, nos habilidad di papia den por lo menos 4 lenguahe, Aruba su esfuerso pa reconoce y desaroya e potencial di nos Industrianan Cultural y Creativo pa cu desaroyo sostenibel y mucho mas.
Esunnan presente a keda masha impresiona cu tur e informacion aki. Aruba Tourism Authority tambe a comparti informacion sumamente valioso pa esunnan presente. Entre e invitadonan por a nota cara di Arubanonan stima y conoci manera Sr. Edward Cheung y su esposa y tambe Sra. Maureen Bunyan, un Arubiano cu tabata tin masha hopi exito como periodista na Washington D.C. pa mas cu 40 aña.
Rum Papiamento tambe a participa den e evento aki pa añadi mas aun na e experiencia autentico Arubano. E anochi a termina cu un DJ cu a presenta nos musica di carnaval y cu disfraznan di carnaval cu esunnan presente por a bisti pa baila cu ne.
Esaki tabata un evento exitoso cu un bes mas a expone Aruba di un tremendo forma, sigurando asina cu nos ta atrae mas turista cu ta interesa no solamente den nos clima pero tambe den un experiencia cultural y natural autentico.
Edjean Semeleer y Chris Kross definitivamente a saca cara di nos isla y a promove Aruba di e miho forma posibel.
