Parlamentario Arthur Dowers tambe a combersa cu kioskeronan. El a splica cu a papia cu un grupo amplio cu tin hopi aña eynan como tambe gruponan cu a bin nobo. Generalmente e hendenan ta contento cu desaroyo di nos pais y e trabao cu a wordo haci pa AVP. Nan tabata kier un kiosco mas grandi, pero e plan tabata cla caba. Tin aspectonan cu falta pa caba ainda, pa haci’e ainda mas atractivo y mas agradabel pa e hendenan por eherce nan trabao. E parti principal ta cu tin un grupo relativamente chikito cu awor aki ta wordo persigui un biaha mas pa e mesun nomber cu a papia riba dje, Otmar Oduber. Lamentablemente el a cuminsa cu un racha di persecusion di tur hende. A tende comersiantenan grandi tambe e ta persigui. E ta hungando un wega di cierto hendenan e ta trece cerca, otronan e ta menasa nan, caba cu nan y por ta despues e ta bay papia cu nan, wak si nan ta bira su amigo, vota pe, etc. pa despues laga nan keda. Ta un strategia di porkeria y ta inhumano. E parti mas mahos di esaki ta, cu kier kita un kiosco di Maria, e ta paga su 500 dollar, y bo kier dun’e na Bernadina. Pasobra cu Bernadina tabata tin u tshirt of pechi di POR bisti. E cos aki tabata un lopende zaak, unda cu nan a haya un contractonan corecto ya for di dos aña pasa. No por compronde cu un hende por ta sin consenshi pa kita esaki for di e hendenan. Ta spera cu e proceso aki yega corte. Si bo kier haci e cos aki di forma ordena, lo e mester bay corte, pasobra nan tin un contract firma. Si bo kier saca nan, tin cu pidi ontbinding for di hues y ta spera cu hues por bati riba su dede pasobra ta imposibel cu por kere cu ta unicamente abo ta esun cu tin derecho di duna hende cu segun bo ta liga na bo partido, un chens pa bin eynan.
E minister a papia diamars pa pone escusa pa su mes cu e kier kita e hendenan aki pasobra e kier pone cierto personanan cu ta artesano. Den pasado, Benny Sevinger a duna diferente posibilidad pa haya un luga, pero e mes a pidi pa nan bay San Nicolas. E parti di mas tristo ta, cu e prome kiosconan, nunca el a duna ningun artesano. A duna su amigonan pa haci negoshi y sponsornan a haya y awo otro hende cu ta busca un bida a haya, kier busca manera pa kita for di nan pa duna otro hende. Ta spera cu ta mirando e ultimo biaha cu despues di un eleccion por mira un cos mahos asina aki. Ta spera cu e pais aki berdaderamente bay bek den loke a conoce e ultimo añanan, como un estado di derecho ta biba. A mira cu hues a bati riba nan man basta biaha caba.
E hecho cu hende por wordo persigui djis pasobra nan no ta sostene un partido politico, ta buta toch un miedo den hende den e pais aki, tin infuencia riba e calidad di bida di e hendenan aki y tambe riba e clima di inversion. Ta pidi pa hende tene pasenshi, e hendenan aki no lo bin pa semper. Nan tey pa un rato y ta bay ta basta lihe ora cu nan bandona e gobernacion y cu pueblo por haya aliento atrobe di democracia. Esey lo bay bula riba henter e pais aki un biaha mas, un momento cu e hendenan aki bandona e posicion cu nan tin awor aki, posicion cu nan a tuma, pa nan abusa y atrapa hende drechi, hende cu segun e parlamentario, no tin ni arte ni parte den e rabia y frustracion cu nan tin pa loke ta politica.
