Recientemente e seleccion di Aruba cu a keda como subcampeon na Boneiro den e campeonato di Pony League a regresa satisfecho, pero cu un otro reto nan dilanti. Venezuela cu a resulta campeon y, como tal, lo mester representa Caribe den Little League World Series, no por haci esaki pa motibo di visa. Pa e motibo ey, seleccion di Aruba tin solamente dos siman pa prepara tur cos y saca cara di e beisbolistanan Caribense. Curtis Fraser, a indica cu ta buscando e sosten di diferente instancia, pero tambe comercio pa por logra esey; specialmente pa e muchanan cu a entrena hopi duro pa yega unda nan ta.
E seleccion cu a bay Boneiro ta muchanan di 9 pa 10 aña. Segun Fraser, nan a enfrenta competencia fuerte di Santo Domingo y Venezuela y asina mes a logra sali na di dos luga. E ganado, cu den e caso aki ta Venezuela, tin e derecho di representa Caribe den e Little League cu ta tuma luga e biaha aki na Louisiana, Merca.
“Aruba tin e nivel cu e trabou cu ta poniendo aden aña aden y aña afo. Hopi di e muchanan aki ta haci trabou extra, no djis den training. E trabou extra ey ta hisa e nivel di baseball na Aruba. Ta muchanan cu ta bin for di South, Center y North League,” Frase a comenta, indicando cu ademas di e dos training cu tin pa siman como ekipo, tambe ta haci hopi na cas. “Pero…no ta suficiente pa nan. Nan mes ta train na cas. E mayornan ta bisa cu e muraya na cas ta na werki.”
Pa e relato completo, lesa TREMPAN
