Diabierna anochi den un atmosfera masha trankilo y cultural, Centro di bario Brazil a celebra hunto cu scolnan basico “Anochi Cultural”. Den cuadro cu dia di Himno y Bandera scolnan basico a participa na un competencia di pintamento. Ta trata di e scolnan: St. Michael School, Colegio Cristo Rey, Caiquetio School y tambe Tarcisius College. E scolnan aki tabata masha activo mes den e ultimo siman nan aki cu e tema di Himno y Bandera. E pintura mester tin figura y aspecto nan di Aruba den dje pa por logra sali triunfador di e competencia.
Tambe tabata tin algun ex studiante cu awe ta profesional den nan trabou presente na e actividad. Presente tabata tin:” Gina Maduro cu ta presidente di sindacato ABV, tambe señora Ras di Cuerpo Policial” y algun cara conocir mas den comunidad cu tabata asisti un di e scolnan menciona. E motibo dicon e personahe nan aki tabata presente; ta pa stimula e studiante nan actual pa por logra nan meta y por finalisa nan estudio cu exito, mirando cu e personahe nan aki tabata sinta den mesun banki cu e alumno nan actual ta sinta aden.
Maestronan y comicion organisatorio ta masha contento cu e resultado final, mirando cu e no ta solamente un competencia pero sino cu e alumno nan ta siña conoce mas di pais Aruba.
