Secretario di estado Raymond Knops (Asuntonan Interno y Relashon di Reino) for di 3 di januari te cu 7 di januari ta realisa un bishita di trabao na Boneiro, Aruba y Sint Maarten.
Na Boneiro Gezaghebber Edison Rijna y Representante di Reino suplente Jan Helmond ta ricibi e secretario di estado. Riba agenda ta figura combersacionnan cu Bestuurscollege y Conseho Insular. Mas aleu e Secretario di Estado lo hiba combersacion cu ‘Young Professional’-nan y e ta haci un bishita na servicio di Agricultura, Criamento di Bestia y Pesca.
Na Aruba tin un audiencia plania cerca Gobernador Alfonso Boekhoudt, pa despues sr. Knops bishita Dr. Horacio Oduber Hospital. Despues ta sigui combersacionnan cu respectivamente Minister President Wever-Croes, minister Bikker (Husticia, Siguridad y Integracion), Conseho di Minister y Procurador General Ter Steege. E secretario di estado ta pasa tambe cerca entre otro Cruz Cora, Aruba Hotel and Tourism Association y Banco di Cuminda pa discuti consecuencianan di e Coronavirus riba e isla.
E secretario di estado ta clausura su bishita na e islanan na Sint Maarten, unda e lo tin encuentronan cu Gobernador Holiday y Minister President Jacobs. Ademas tin bishitanan plania cerca algun empresario y representante di diferente NGO, pa papia tocante experencianan di e aña cu a transcuri. Mas aleu sr. Knops ta bishita e paviljoen nobo di COVID-19 y Cruz Cora. Riba tur e tres islanan ta clausura e bishita respectivamente cu un momento cu prensa.
