Aruba tin un total di 89 mil auto cu tin cu keur. Esaki ta segun Richella Dorothal, director interino di DTI.
Sinembargo den 2020, 18.900 auto a presenta na DTI pa haci keuring, di cual mas of menos 14 mil a keur y e restonan no a keur, sin conta overschrijving. Esaki ta suma un total di 4838 auto cu no a keur. Fuera di esaki tin 70% cu no a ni presenta pa keur of pidi un cita.
Esey ta unda cu e preocupacion ta awor aki. Den 2020 tabata mas of menos 30%. Na 2019 tabata 37%, cual tambe tabata un porcentahe abao. Dorothal ta haci un apelacion na tur automobilista, e 70% cu tin cu show up ainda, pa pasa haci cita pa asina por keur nan auto mas pronto posibel pa asina evita cu ta haya un boet di polis, cual ta core den careda di 250 florin.
E citanan ta coriendo te den luna di april. Si e keuring ta bay caduca, bin un of dos luna prome pa por haya un cita cerca di e fecha cu e keuring ta caduca.
E proceso di keur por tarda un tiki Pa e sistema di keurmento, a cambia algun cos. Por ehempel e uzo di balie, cu antes e keurdonan tabata presenta eynan na momento di keur. Awo e balie ta sirbi so pa haci cita pa keur auto. Mester a adapta pa distanciamento social y tambe otro medidanan di higiena. Esaki a haci tambe cu mester a baha e cantidad di autonan cu ta keur pa ora.
Na momento di keur, e keurdo ta desinfecta e auto y despues cu e keurmento tuma luga tambe ta desinfecta e auto un biaha mas.
Otro peticion cu ta pidi e publico pa por fabor bin cu e auto limpi, sino e keurdo por nenga di keur e auto e momento ey, cu ta haci cu e chauffeur mester pidi un otro cita pa por keur su auto.
Otro aspecto cu e directora interino a menciona ta pa bin na e ora stipula, ni mas tempran of mas despues, sino ta core e riesgo cu e auto no ta keur.
