Mainta a habri cu un noticia alentador. Parlamentario Alvin Molina a informa nos cu e cancha di basketball na Village, San Nicolas, pronto lo haya un renobacion completo.
Den un entrevista cu Molina, el a splica cu a pesar di tur e retonan cu Aruba a pasa aden den e ultimo dos añanan, e situacion financiero precario cu ainda nos ta aden como tambe e situacion di e recorte y sin laga afo, e guera cu tin andando na Europa, ta importante pa corda tambe riba e futuro. Como ehempel pa e ultimo aki, el a uza e cancha di basketball na Village, den caya St.Maarten.
Molina a señala na e estado decadente di e cancha, entre otro, con e basketnan ta tur putri, e hekwerk cu ta practicamente no-existente, luz daña, e veld mes cu ta tur blikia, gazebo kibra, e bankinan tur na werki y a puntra su mes: “Kico esaki ta comunicando na e comunidad?” Asina el a corda riba un teoria cu ta bisa cu mas bo laga un comunidad bay atras, mas e lo sigui bay atras. Molina a lamenta cu a laga e canchi aki bay asina atras y ta sinti cu e muchanan di e vecindario sigur merece miho y merece di por sinti nan mes orguyoso di nan cancha di basketball.
Deporte semper tabata un factor importante na San Nicolas, Molina a splica, añadiendo cu tur esaki ta curasha conexion entre famia y e comunidad, asina creando un base di confiansa pa hunto preveni cu e muchanan bay den mal caminda. Asina conhuntamente cu e minister di deporte, nan a bin cu e idea pa busca ayudo for di e otro ministerionan tambe, ya cu por mira esaki como un proyecto social y di infrastructura tambe. Pues, e minsternan lo bay sinta hunto pa wak unda por kita di cada budget p’asina inverti den renobacion di e cancha di basketball.
Pa un relato mas amplio lesa edicion di TREMPAN.
