Dia 11 y 12 di april ultimo e alumnonan di Ciclo Avansa 1 di Maria College MAVO a bay haci nan pasantia den diferente rango di trabou. E pasantia aki tin como meta pa yuda nan haya un idea con nan futuro trabou lo ta.
Haciendo esaki nan por scoge un miho profiel di examen pa ora nan ta den Ciclo Avansa 2. Den luna di mei nan a completa nan pasantia, entregando un relato y a tene un presentacion di kico tur nan a siña durante nan pasantia.
Un di e alumnonan cu a participa den e pasantia a indica cu e experiencia tabata uno super inolvidabel. El a bay dos caminda, esta un scol y un cushina. Despues di a mira e dos profesionnan aki, e idea di bay den e profesion di enseñansa como maestro a yama su atencion. E alumnonan a bishita diferente compania pa asina mira kico tur tin pa ofrece.
Algun alumno tabatin pensa di bira veterinario, pero despues di a mira e trabou algun di nan a sinti cu esey no ta pa nan y p’esey awo nan sa mas ki pakket pa scoge. Nan ta contetno di e oportunidad ricibi di bay haci pasantia, pasobra pa nan esaki ta e miho manera pa nan sa ki pakket nan tin cu scoge pa ora di bay Ciclo Avansa 2, esta 4de jaar.
E gruponan di Ciclo Avansa 1, cual ta alumnonan di 3rde jaar, a ricibi certificado di “Beroepsoriënterende stage 2019” despues di dos (2) dia di pasantia. Coordinador di stage Dayenne Valdink ta manda un danki di curason na tur compania, stichting cu a duna e alumnonan un chance pa asina haci pasantia cerca nan. “I am because we are!!!” ta e lema di e aña aki cu e alumnonan di Maria College MAVO.
