Diadomingo ultimo 19 di mei, Organisacion di Pensionado Publico Arubano (OPPA) a tene su prome Reunion General pa e aña aki den Centro Deportivo Franklyn Bareño na Piedra Plat. E reunion a cuminsa 9’or di mainta y a termina 1’or di atardi cu un sonrisa di satisfaccion riba cara di tur miembro presente, pasobra e reunion a bay den un ambiente hopi ameno.
Pa e miembronan di OPPA e Reunion General no ta un reunion mas, sino un salida agradabel riba un diadomingo mainta pa topa cu otro y pasa bon.
Segun nos e reunionnan di OPPA ta hayando un asistencia grandi di su miembronan, pasobra e directiva ta duna tur e miembronan presente e oportunidad pa expresa nan preocupacion y ta haci lo posibel pa busca un solucion pa e preocupacionnan treci dilanti. E reunion a bay cu hopi interaccion y e directiva tabata habri tambe pa e comentarionan negativo cu cierto miembronan ta trece dilanti. OPPA su directiva semper ta purba di saca lo mehor di e criticanan cu e miembronan aki ta trece dilanti y ta keda positivo den tur e trabounan cu nan ta eherciendo pa e miembronan.
E Reunion General di 19 di mei 2019 a haya asistencia di 182 miembro, esaki ta duna un satisfaccion na e miembronan di directiva pa tur e trabounan cu nan ta haci.
Durante e punto 2 di e agenda, Participacion, e presidente, Sr. Ivo Valdes, a participa unda OPPA ta para en conexion cu tur e trabounan haci relaciona cu e edificio di OPPA.
E miembronan tabata contento di tende cu tur cos ta canando bon y ta spera cu pronto nan lo por cuminsa pasa mainta y bebe un kofi den nan propio edificio.
Un otro punto interesante di participacion ta e bishita di un delegacion, mas o menos 60 pensionado, di e “Bond voor Belangenbehartiging uit Overheidsdienst” (BBGO) di Surnam cu lo ta di bishita na Aruba di 24 pa 31 di mei 2019. OPPA lo ricibi e coleganan di BBGO cu un fiesta di Bon Bini diasabra anochi, 25 di mei, di 7’or pa 12’or den Club Portugues na Primavera.
Den e reunion aki e miembronan a aproba tanto e Relato Anual 2018 di Secretario como e Relato Anual di Tesorero.
Despues di e reunion, Sra. Belkis Moreu a duna e miembronan presente un charla chikito di motivacion pa nan keda activo apesar di nan edad, pasobra edad ta un cifra y cada pensionado ta dicidi con e ta sinti y no por laga e cifra dicidi esey p’e.
Un charla cu e miembronan a acepta cu hopi entusiasmo pasobra nan ta hopi positivo, cu un gana enorme di biba nan bida na e manera cu nan mes ta desea, biahando, baliando y gosando di e bida manera un pensionado so por!!
Den e ultimo parti di e reunion, OPPA a lansa su website: https://www.oppaaruba.org cu un brindis di champagna pa un otro logro di e directiva actual.
Directiva ta gradici Sr. Ruben Celestijn di e compania RC-ITconcepts cu a yuda OPPA cu e lansamento di e website. Pronto tur e miembronan di OPPA por busca tur informacion cu nan ta desea riba nan propio website.
