Recientemente e alumnonan di Abraham de Veerschool a reuni na Alhambra Ballroom pa asina ricibi nan diploma.
Presente na e ocasion aki tabata e cabesante y cabesante interino, como tambe e docentenan, Minister di Enseñansa, Rudy Lampe, directora interino di DPS, sra. Nora Eleonora, amigo y famianan, pa asina celebra e hecho cu e muchanan a cumpli cu un logro grandi den nan educacion.
Segun cabesante di e scol, sra. Jane Hooft, e aña escolar pa Abraham de Veerschool a bay basta bon. A cuminsa cu 74 candidato di cual 4 a cay afo na prome instante, cu verhuizing, etc. Pero despues na final tin 1 tambe cu a bay abao, e ora nan a keda cu 69 candidato cu a bay te na final, di cual 36 a gradua. E scol tin 52% cu a gradua. Nan a bay all out, pasobra nan ta desea pa e porcentahe bay halto. E scol ta un bon scol.
Nan tin un bon team. Cierto cosnan ainda por cambia y ta bezig ta evaluando. Pero ta trahando cu diferente mucha di diferente background y tambe cu ta bin di diferente otro scol. Cada un di nan ta diferente y tin cu yuda nan yega na nan meta final.
Segun juffrouw Hooft, hopi di e muchanan ta kies hopi pa MW y no pa e otro vaknan y e tin su motibonan personal pa cada alumno y tambe e otro factornan cu ta hunga un rol cu a haya e muchanan di diferente scol tambe, scolnan basico y tambe scolnan cu ta prepara por ehempel di prins Bernhards cu ta bin y tin biaha tin un deficiencia den idioma of den rekenen. Pero asina mes ta bringa te final. Tin mas otro factor cu ta hunga un rol. Pero ta purab di tur banda pa e muchanan yega na nan MAVO diploma. E cabesante a splica cu e ta satisfecho cu e muchanan cu a slaag, pero semper kier un resultado mas halto.
Directora Interino
Directora Interino di e scol, Jeanette Hooker, a bisa di su banda cu e tabata resando na Dios cu nan ta bay maske ta un porciento dilanti y esey a pasa. Nan a bay un tiki dilanti. Paso pa paso nan lo sigui bay dilanti tambe. E ta kere fielmente cu tur aña e lo sigui mehora, pasobra ta sigui traha y sigui empeña pa cos mehora. E factornan cu ta hunga un rol pa e resultado di graduado ta hopi complica. Tur aña ta purba di calcula kico ta e motibo pakico hopi mucha no ta slaag na Abraham de Veerschool. Por ehempel e aña aki a evalua e examen mes.
Na Hulanda sa cu e VMBO y HAVO schoolnan ta traha cu un gemiddeld examencijfer di 5.5 pa por slaag. A conta tur e muchanan cu a gradua, y tur sin falta a slaag cu un averahe di 5.5 pa examen. Si ta bay midi na e nivel ey na examen, nan ta prepara. Sino nan no ta yega e averahe di 5.5. E muchanan ta prepara, pero di un manera no sa kico ta pasa na final cu nan no ta yega na e meta final. No por bisa ainda cu a saca afo cua ta e factor cu ta realmente doorslaggevend cu hopi mucha no ta slaag. Pero si ta wak cu tin mucha cu ta haya un di dos oportunidad y si ta logra. Esey ta haci nan hopi orguyoso, pasobra e docentenan tey pa tur mucha, no pa uno so of algun so. Nan tey pa tur mucha. Nan ta duna tur oportunidad y trata nan tur igual pa nan yega final. No ta worry so cu e porcentahe di graduado. Tur mucha ta haya oportunidad pa bay te na final y no logra, ta movita nan toch pa nan sigui. Ta haya menos dropouts na e scol y esey pa e directora interino ta bal hopi.
Conexion cu e docentenan
E team di docente cu e scol tin ta dispuesto pa sacrifica extra tempo si tin mester, con cu bay bin, nan ta yuda e muchanan pa sigui bay padilanti. Esey ta loke ta hopi di balor. E directora adhunto ta spera di sigui conta cu nan tur aña pa sigui yuda e muchanan. Hasta e muchanan cu tin tiki problema ta logra, pasobra e docentenan ta pone extra di nan banda pa nan logra.
Mensahe
Nunca give up, segun e directora interino. Sigui te final. Sigur lo haya contratiempo de bes en cuando. Pero sigui ba pa bo meta, pasobra despues di MAVO tin hopi luga pa bay ainda. Aruba mester dibo, Abraham de Veerschool tin mester dibo. Bay pe, sigui traha y no give up. Ta sigur cu nan por.
DPS
Nora Eleonora, directora interino di Dienst Publieke Scholen tabata tey presente durante di e graduacion di e muchanan. E aña aki tin cu bisa cu e scolnan cu ta cay bao di DPS, tin un marathon di e graduadonan. Eleonora a asisti na varios di e graduacionnan. E muchanan aki a haci nan best. Nan a traha pa sigui pa nan futuro na un manera hopi positivo. Tin un team di docente cu ta dicidido y cu pasion. Eleonora ta hopi gradici cu nan trabao y por mir’e. E muchanan tabata asina contento, bunita bisti y sa di kico nan a bin haci. Esey ta loke cu e directora interino a keda hopi di aplaudi y no por a keda sin bin.
Satisfecho
DPS ta satisfecho. Segun Nora Eleonora, minister a baha e norma di entrada compara cu e otro añanan y tin cu bisa cu esey ta yuda hopi mucha pa bay haya nan diploma pa nan sigui cu nan carera profesional.
Mensahe
No laga e cos keda akinan. Sigui siña, sigui siña, sigui bay dilanti. Tin educacion online, tin educacion via Facebook. Tin diferente manera pa sigui bay padilanti. No tin mester di bay den exterior. Na Aruba tambe tin e otro scolnan manera MBO, EPI y tambe Universidad. Despues di Universidad, bo por sigui pa PhD. No cansa di studia. Sigui enrikece bo mes
