Dia 14 di juli 2021, Alliance Française Aruba e tene un celebracion encuanto e dia nacional di Francia “Fête nationale”. Esaki a tuma luga den e Arikok Saloon na Hyatt Place Airport Hotel.
E meta di Alliance Française Aruba ta pa promove e lenga y cultura Frances. Erick Vink, presidente di Alliance Française Aruba a comenta cu e aña aki e ceremonia tabatin un toke diferente. E celebracion aki tabata semper un dinner comun y coriente, pero e aña aki nan a inclui recitacion di poemanan na Frances, canticanan na Frances presenta en bibo como tambe e reparticion di certificado. Den esaki nan a invita e miho graduado den Frances di VWO, esta Nicole Diana Muñoz pa e tambe participa den e evento aki hunto cu su mayornan.
Nicole Diana Muñoz a caba di termina su VWO 6 y a sali e miho graduado di VWO como tambe e miho gradua den e idioma Frances.
E ta gusta e idioma, e ta hay’e uno hopi bunita, el a scoge esaki debi na cu e ta gusta reta su mes y como cu ya e tabata conoce t’e idiomanan Spaño y Papiamento.
Nicole ta bay continua cu su estudio na Hulanda unda e lo bay studia medicina. Idealmente lo e desea di bay Francia pa haci stage of algun specialisacion di medicina y asina conoce e cultura y e pais di e idioma cu tanto e ta encanta.
Pa cobertura mas amplio, lesa e edicion di TREMPAN mañan.
