Parlamentario Alan Howell ta contento cu resultado di e vragenuur cu el a pidi cu Minister di Medio Ambiente riba e tema di incinerador. E tabatin 11 pregunta cu e tabatin deseo di haya contesta riba nan y el a keda contento cu loke el a tende.
Den un declaracion cu el a duna, el a bisa cu e motibo cu el a pidi pa “vragenuur” ta pasa esaki e ta un representante di pueblo y ta pregunta cu pueblonan ta haci na dje. Pues pueblo tin derecho tambe pa scucha loke e Minister concerni tin di bisa riba e preguntanan.
Den henter e plan pa pone un fin na loke ta tumando luga riba dump actualmente, Gobierno tin diferente proceso andando. Den e prome fase a scoge un compania caba cu ta bay ta encarga cu un di e incineratornan chikito. “Mi ta hopi contento di scucha cu un compania local a gana e bid aki,” Parlamentario Howell a bisa. Ainda falta tres bidding cu ya caba ta na caminda y ta den e fase di Request for Proposal. Den esaki a participa tanto companianan local como internacional, segun informacion cu nan a ricibi den Parlamento. Den luna di augustus lo por tin un decision definitivo di cual ta e tres companianan cu ta gana e bid.
E Minister a bisa Parlamento cu e forma con a maneha dump pa hopi aña no por sigui. E habitantenan den bisindario a wordo priminti semper cu ta bini cu un miho manera pa procesa sushi, cu ta na bienestar di medio ambiente y salud di e habitantenan. Y esaki e mandatario a priminti cu e lo bay traha pa cumpli cune.
https://facebook.com/24ora/videos/301087977505831
Howell a bisa cu apesar cu ta trata di su propio Minister, e no a duda pa hacie e preguntanan, ya cu ta trata di informacion cu pueblo kier haya. E contestanan di e Minister tabata satisfactorio pa su persona y ta contento cu Minister Oduber semper ta acudi na Parlamento pa contesta preguntanan.
Si el a lamenta cu ningun miembro di oposicion no tabata presente pa haci pregunta, apesar cu ta fraccion di POR ta esun cu a pidi pa e reunion. E tabata un bon chens pa nan haci pregunta cu nan tin.
