E siman aki durante un bunita ceremonia, e rotonde entre Horacio Oduber Hospital y Alhambra Casino a wordo inaugura y dedica oficialmente na Alex Nieuwmeyer (den feliz memoria). Presente pa e ocasion special aki tabata su señora Barbara Nieuwmeyer, yiunan Jessica, Zoe, su nieto, miembronan di famia y su famia di Divi Resorts y amistadnan. Tambe tabata presente Minister di Turismo, Salubridad Publico y Deporte demisionario Dangui Oduber, CEO di A.T.A. Ronella Croes, y staff y team di Divi Resorts
Den su discurso, Ronella Croes a comparti cu Alex Nieuwmeyer sigur a laga su pasonan visibel riba nos isla.
Despues cu Alex a studia hotel management na Hulanda, el a inicia su carera interesante na Merca unda el a traha pa varios propiedad di Sheraton den F & B, pero tambe den management, entre otro na Boston, Los Angeles y tambe na Montreal – Canada. El a asumi e rol di vice-presidente di F & B pa e prestigioso Bally’s na Las Vegas, Nevada, na Merca y djey su ultimo funcion tabata na New York cu e cadena di Doral Hotels.
Di eynan Alex a yega Aruba y esey tabata 27 aña pasa y el a cuminsa guia e exitoso cadena di hotel di Divi.
Sra. Croes a sigui bisa cu Alex tabata un hotelero y lider bon respeta. No solamente na Aruba, pero tambe na Norte America, Europa y Latino America. El a kere fuertemente den Aruba su forsa y den nos potencial como un destinacion di turismo di nivel halto. Semper el a percura pa e promesa di e producto di Divi y su team wordo cumpli cual ta entrega un servicio di balor y di calidad halto. E tabata conoci pa tin confiansa completo den su ekipo di Divi y semper e tabata inspira su coleganan pa nan sobresali den locual nan ta haci. Tambe e tabata percura pa Arubiano wordo promovi den puesto halto y clave den liderazgo y posicion di management dentro di Divi Resorts.
Mientrastanto, e nomber di Divi a bira mas fuerte y e tabata evolucionando di un European Plan (EP) pa uno cu ta ofrece e producto All-Inclusive y Time Share tambe. Tur esaki cu un reputacion solido entre e socionan, ‘tour operators’ y consehero di biahe. E exito aki ta tributo na Alex y su team cu el a forma pa desaroya esaki hunto cu n’e.
Y manera semper, Alex tabata un mentor pa hopi di nos laborando den e industria di turismo. El a duna su apoyo den e esfuersonan pa mercadea Aruba na Norte America, Europa y Latino America. Bou su guia a logra exitosamente pa atrae vuelo directo cu VING for di Suecia y cu TUI for di Reino Uni pa Aruba.
Pa Aruba mes Alex tabata un colaborador grandi pa locual ta trata evento internacional di turismo, locual ta haci’e un persona berdaderamente inolvidabel. Alex y su ekipo realmente a sobresali den e eventonan di Divi y hopi biaha e tabata e prome pa introduci un concepto of idea nobo pa Aruba.
Den su tempo liber e tabata gusta hunga golf locual a percura tambe cu pa medio di su pasion pa e deporte e tabata confia cu pa medio di golf Aruba por atrae bishitantenan afluente y asina el a host algun di e miho eventonan di golf pa Aruba. Ademas, e tabata un gran promotor tras di evento, manera Beach Tennis, Aruba Art Fair y el a organisa evento increibel manera y prome evento culinario pop-up ‘Micheline’ den e area di Caribe na 2019, cual tabata un exito rotundo.
Na aña 2017 Alex a forma parti activamente di e Hunta di Supervision di Aruba Tourism Authority te cu dia 31 di maart 2021. Alex a atende su ultimo reunion dia 25 di maart y e tabata hopi activo como miembro: semper tur hende por a conta riba dje, tumando su tempo pa revisa asunto di e Hunta di Supervision, dunando e miho di su mes cu semper t’ey pa yuda tur hende!
Alex a laga un conexion profundo, profesional y personal atras cu tur esnan cu tabata conoc’e: semper e tabata cla pa guia y pa duna conseho. Manera e expresion ta bisa: “E tabata un shon di hende” cu tabata stima su Aruba masha hopi mes!
Cu e inauguracion di e rotonde, Ronella Croes a comparti un bunita cita: “Circulo, manera nos alma, no tin fin. E ta bay rond y e ta sigui bay rond sin stop,” un quote di Ralph Waldo Emerson.
Alex su persona a toca hopi hende y e ta sigui biba den nos comunidad pa medio di su bondad, guia y amistad infinito cu el a comparti. Su alcance ta infinito manera e rotonde cual circulo tampoco tin un fin.
